Colomn Kees Jansen: Taleant

Taleant
Ze zeent 't d'r zowat allemoal oawer eens: taleant helpt. Vuur de rest is 't keaihard woarken a'j wat bereiken weelt. In völle gesprekken met bekeande musici, sportleu, wetenskoppers of chef-koks zin ik dit al tegen-ekömmen. Ik leus ooit 'n interview met Mstislav Rostropovich, den wal 'n besten cellist van de twentigste eeuw neumd wordt. 'Taleant is mooi', zea hee, 'mear het helpt oe allene mear. Zoonder keaihard woarken en oe alledage dom oefenen bereik iej de top nit.'
'n Zetje terugge was Kijken in de Ziel op tv, det prachtige programma van Coen Verbraak. Disse keer met allemoal wetenskoppers. Ionica Smeets zat doar ook. Zee is wiskundige en zee zea teegn Verbraak det zee beheurlijk vake hoogleraren in eur vakgebied was teegn-ekömmen dee gewoon op de mavo hadden eleard. 'Bliekboar', zea zee, 'zeg taleant toch nit alns en is hard woarken belangrieker'.
't Koomp d'r op dale det taleant hebben mooi is, mer det 't gebroek teelt. Mer 't duch miej det d'r ook nog wat aans belangriek is: jonge möage de kaans gewen iets met eur taleant te doon. Vake zeent euldere vakleu doar 'n betjen höarig vuur en det is begriepelijk netuulk. Iej weelt nit geane det d'r wat mis geet. Of mangs is 't te deur um jonge möage te loaten studeren of ne sport te loaten doon. Mer kaansen kriegen is wal onmeunig belangriek.
Doar mos ik an deanken toen ik een vroaggesprek zag biej Oxford Union, ne Engelse debatclub. Doar was Marco Pierrre White, nen heeln beroomden chef-kok. Hee vertöl oawer zinnen weg noar 't succes. Het belangriekste doarvan was miskien wal dat d'r duren vuur um lösgungen dee vuur aanderen dichte-blewen. Hee kon biej de beste chefs dee d'r warren an 't woark: helemoals oonderan de lädder, mer met keaihard woarken hef hee zik noar 'n top eknokt en hee wör 'n jongsten Britses chef ooit den dree Michelin stearn wun.
Anleg, hard woarken en kaansen kriegen. Dan is d'r vuur iederene wat te doon; vuur oolders um te kieken woer de kwaliteiten van de wichter lingt um ze doar wat moois met te loaten doon en de wichter te stimuleern um d'r an te goan met de lippe; vuur leu met wat ervaring dee met joonk taleant te maken kriengt en dee op de juuste manere dee gäste gangs hooldt; en netuulk vuur jonge möage zölf dee allene mear wat bereiken köant duur heel hard te wosseln en duur nit te greuts te wean um leare an te nemmen mer ook nit te bange um wat te woagen. Goat d'r mear an stoan!

Kees Jansen