Afbeelding
Foto: Jan Joost

Platte Column: Kammenet-emotie

Algemeen

Vanof de tied de-k an de Rozengaarde 57 woonden en miej dinge kan herinneren is det de an de bleende mure in de kamer een wortelnötten kammenet steun. Det kammenet is, nöast det het een groot kebof is met ne heugte van 2,41 meter, zoonder de milnste komme, vuural ne grote opboargkaste.

Doarmet is nit alns ezegd van een kammenet. Het was vuural ne kaste den at vake al van generatie op generatie oawer gung en doarmet een soort ‘heiligdom’ wör. Hoe vake zea min va wal nit: “Vot doar, vuur det kemmenet hen!” Det kammenet was biej oons evuld met zakdeuke, roln snoep, foto-albums, pakpepier en sköaterwoark. Doar moch-e viej dan per gratie biej, mear een poar van dee lades binnen in het kammenet bleewn dichte. Doar leaden oolde aktes in van groondtransacties, boedelverdelingen, har der vuural ook met te maken det min groffa ene van de firmanten was van het tichelwoark an de Hatteweg.

Histórie! Dee kaste is dikke 200 joar oold! En dee kommen zeent originele Petrus Regoutkommen

Min va störf vurig joar meai, min moo afgelopen april. Umdet ze op verzorgingstehoes Maranatha woonden, mos het keamerke met een poar dage löag. Met minne beaide zusters he-w ’t spil verdeeld. Het kammenet is oet mekoar ehaald en steet in ’n opslag, de 5 kommen ook.

Mear loat non gin meanske van de wichter en kleanwichter det kammenet wiln hebben. “Jóngs! Dit is histórie, dee kaste is dikke 200 joar oold! En dee kommen der biej! Det zeent originele Petrus Regoutkommen.” Op ene van dee kommen zit oart nen broenen anslag. Déé komme kreeg joarenlaank ’n rook van het lösse veur van het oolde hoes langs zik hen. Ik heb de femilie roond-ebeeld, mear ook doar gin gewag.

Non jea, dán mear noar de veiling of marktplaats. Het Twentse Veilinghuis in Eanske lachen miej oet. Een poar kommen mos ik mear dreks kot loaten vallen, want doar warn een poar sköatjes of en de rest: hee wol der miej nog gin 50 euro vuur gewen.

Det kammenet brach in de goo joaren wal 10.000 euro op. Dee wortelnötten kaste hef non nog gin 10 preceant van de wearde van toen.

Aj toch noa goat det der vroger leu warn dee at trouwen, mear umdet het kammenet nog nit kloar was, vuurlopig nog nit het hoes gungen bewonnen en hoe at min va met det relikwie umme gung.

Chinees porseleinkenner Capel & Capel oet Kaampen adviseren miej um dee kommen nit vot te doon. Ze warn miskien viefhonderd euro weard, mear vernöm an miej wal det de emotionele wearde völle mear is as een poar rotknaken.

At der nog ene belang hef biej zonne historische kaste mut’e miej mear bellen.

Gerard Voortman

Een tenue van FC Twente en deelname aan het eindtoernooi zijn enkele van de te winnen prijzen.
Straathoekwerk doet mee aan de FC Twente Cup 13 uur geleden
Edwin en Marc Burggraaff van Tip Top Design. "Schuifwanden voor de berging en zwevende wandmeubels zijn op dit moment populair.”
Sterk in maken kast en schuifwand 19 uur geleden
Afbeelding
Julia Seppenwoolde wint Johan Knaap Games 800m 21 uur geleden
Mango Mobility Almelo is specialist op het gebied van mobiliteitsproducten. Ontdek het brede assortiment in de showroom.
Mango Almelo viert 12,5-jarig jubileum 23 uur geleden
Afbeelding
Meikeverrit weer een groot succes FOTO'S 24 mei, 17:49
Emmens: "Help mee om de plannen van het windpark Vletgaarsmaten af te blazen."
Verontrust over komst grote windturbines 24 mei, 16:06
Afbeelding
Kennis & Inspiratiesessie voor Ondernemers 24 mei, 15:46
Henk Nijkamp (CDA): “Wat ons betreft moeten er op deze plek helemaal geen windmolens komen! Ze staan te dicht bij woonwijk De Liesen en de nieuwbouw van scholengemeenschap De Waerdenborch.”
Nijkamp: windplan op pauze zetten? 24 mei, 13:42