Gerrit Dannenberg

Geluk

Temet weunske viej mekoar allemoal wier völle geluk vuur 't nieje joar. En det is heel good. Mer wat is geluk non fealijk? Der wordt völle oawer filosofeerd. Mer det is vuur iederene absoluut nit aleens.
Vuur nen domie ne volle koarke? Vuur nen baankdirecteur hoge hypotheekreante. Vuur 't peard van Sunterkloas een plat dak en vuur Jan van Schaffelaar zol ne trampoline een groot geluk wean ewes. Nen kleanen porren vreug an de moo: "Moo, heb iej geluk in oew huwelijk?" Zeg dee moo: "Ik deanke oew va wal." En dee va zea: "A'j trouwt he'j twee meugelijkheden: óf iej wordt gelukkig of iej wordt filosoof…." Oawer geluk kom iej nooit oet-efilosofeerd.
Der zeent ook nen hoop oetdrukkingen oawer geluk: Doar he'j nog wal geluk ehad. / He'j de hassens estot? Nog een geluk da'j hassen hebt. / Hendrik Jan is aaltied plezerig: hee koomp nog ne keer van geluk oonder 'n trein. / Geeld maakt nit gelukkig, mer het is wal 'n gelukke da'j der nen hoop van hebt. En van det geeld is ook wier betrekkelijk, want a'j geeld genog hebt kö'j nog nit eens zat etten, want a'j det doot, dan wo'j völs te dikke. Mer doar hef Niek Wessels van Personal Training wier geluk met of Artros. Mer geeld zélf maakt nit gelukkig. Deankt mer nit det de kearl met 12 miljoen gelukkiger is as de kearl met 11 miljoen? Geleuw'k niks van.
Een heel biejzeunder geluksgeval gebuurden lest biej een skoonweenkel. Ik goa aaltied noar Steenbergen hen vuur de skone, zeker as ze wier ne keer opruming hebt. Ik passen een poar mooie Van Bommels an. Nöast miej gong een heanig kearlke zitn met 'n froai opvalnd hoarstukn. Hee zakn een betjen meu dale op de baanke. Jurgen van Steenbergen vreug um watvonne skoonmoate hee har.
Hea zea: "43, mer doot miej een poar skone van 41!"
Een skoonmaker begreep um nit good: "Mer a'j 43 hebt, kö'j toch völle better ook 43 nemmen."
"Nee," zea 't kearlke, "ik wil 41."
"Mag ik miskien ook weten woerumme a'j det doot?" vreug Steenbergen vuurzichtig, "want det keump nit heel völle vuur."
"Det za'k oe vertellen," zea 't kearlke. "Ik zir vertegenwoordiger en ik goa langs de duren um ofwasbössels te verkopen. Mer 't geet nit zo good met de ofwaskwäste. Dee vaatwassers doot miej miej de dasse umme. En doarumme nem ik de skoone aaltied twee moaten te klean. Want dan he'k een gaansken dag langs de duren eslept, en dan he'k niks verkoch….en dan kom ik 's oawends in 't hoes, dan goa'k op de baanke zitten...en dan doo'k de skoone oet...en dan veul ik miej zó gelukkig.