Marieke Dannenberg
AlgemeenKleare
Mien zuster geet trouwn. Det is een excuus um boetn 't budget um kleare te koopn. Mooi op tied sprakn viej ne doatum of met de dames (de moo, de jongste zuster, ne skoonzus, ik en de bruid zelf vuur de gezelligheaid). Want stel oe toch eens vuur da'w niks veendt, dan he'j gelukkig nog eawn.
Vuur mooie kleare mu'j biej She's different in Riessen wean. De dames hebt mooie jurkjes, ze hebt der verstaand van en ze helpt oe good. Iej kriengt ne lekkere komme koffie en a'j eslaagnd zeent koop iej een lekker breudje. Nen halven dag later ha'w ammoal feestkleare vuur de brulfte, inclusief skone, täskes en sierdinge.
's Oawends leu'k mienen langen rok met blouse en noaldhakken an mienen Gerwin zeen. "Mooi heur. Wat mag det wal nit kosten?"
"Met 'n poar hoonderd euro kom iej nen heeln eane," zea'k vuurzichtig.
"En det vuur enen dag," zea mien economisch ingesteelde kearlke.
"Woch mear, iej munn ook nog um kleare gangs."
De wekke der op gunge viej vuur Gerwin noar Jac Hensen. Hee kochen ne greune bokse, 'n wit oawerhemd en nog een boezeroen van blauwe jersey stof. Toew wier in thoes warren, veune viej 't al nit mear mooi. De wekke der op he'w alns wier teruggebracht. Gerwin passen nog ne keer alle kleare an in 'n weenkel, mer niks was good genog.
Nog ne wekke later dee'w wa'w dreks hadden munn doo: noar Koediek Mode in Riessen. Doar veun Gerwin 'n mooi pak. 't Pak wörden besteeld en de wekke der op mozze wier hen anpassen um te loaten vermaakn. Ik har miene kleare met-enömmen um te kieken of de kluren 'n betje biej mekoar passen.
Viej deden beaide de kleare an en de verkoopster reup enthousiast: "Iejleu liekt zelf wal 't bruidspaar!" Dat was netuurlijk ne verkooptruc want ik har helemoals gin wit an. Mer 't was ook hartelijk bedoeld en viej warren dikke tevreaden. 'n Oold wiefke steun der biej te kieken en zea: "Moojn rok! He'j den biej She's different ekoch? Heb ik ne ook van."
Marieke Dannenberg
