Afbeelding

Gerrit Dannenberg

Algemeen

Präwl
Enen leazer was met het stukn van vurige wekke helemoals eens oawer al dee leu dee biej 't ofscheaid aaltied zo völle humor hebt. Nen aandern veun het woord 'präwl' een mooi woord. En ene zea det het verhaaltje van de Kroaje roar eindigden. Klopt: de leste regel met de clou was vot-evöllen. Doarumme det verhaal nóg ne keer. Dus at oe bekeand vuurkeump dan he'j geliek.

Biej hoogtepeunten en deeptepeunten in 't leawen wordt 'r nen hoop elöagen. Eagelijk is 't nit echt legen, mer mear fantaséren. Biej jubileums, groown, brulften en ofscheaid van bedriewe heu'j heel vake de meuiste verhalen oawer de leu. Lest wa'k op 'n ofscheaidsfeestje van nen kearl den 'k heel good kenne en ik dachen: geet non oawer um of zin´k gek?
Ach, netuurlijk snap ik det wal: op 't skeaiden van de moarkt doo'j mekoar ginnen trad noa. Mer toch…
Wat opvaalt is det álle leu biej 't ofscheaid ineens geveul vuur humor hebt. Good beschouwd nemt 'r allene mear komieken ofscheaid. Der wordt vake ezegd det ze gewetensvol zeent, harte vuur de zaak hadden, heel secuur warren, vasthooldend, duurpakkerig en helemoals an 'n eande hebt ze verestig ook nog geveul vuur humor. Geewt mer 's ach: ook al hef een vertrekker 'n humoristischen inslag van nen schildpad, dan nóg wordt eprezen as slim humoristisch. Een grötsen präwel wordt eprezen as cabaretier. En at'e aaltied heel slim saggereainig is ewes, dan zegge viej: "Hee har een biejzeunder geveul vuur humor." En hoo hätter a'j der dan biej lacht, hoo mear z'oe geleuwt.
Gerrit Kraa kreeg ofgelopen vriejdag de Twentse Taalpries. At 'r ene dee pries verdeend hef, dan is 't Kraa wal. Hee hef der lange op munn wochen. Det krie'j a'j gin meanske noar 'n moond kuijert. Gelukkig zea gin meanske det hee wal 'n biejzeunder geveul vuur humor har.
An 't eande van zin daankwoord verteelden hee det mooie Tweantse verhaal van Mans den op 't leste lea. Zin breur Graads zol der ne keer achterhen munn kieken, mer ze konnen nooit zo good met mekoar. Mer ook de pastoor veun det Graads ne keer oawer zikzelf hen mos stappen: "Goat 'r non hen en doot mekoar de haande. Temet is'e oet de tied en dan he'j der oe leawen laank spiet van."
In 't lesten gong Graads dan mear.
"Doar wa'j?"zea Mans.
"Doar wa'k,"zea Graads en ze deden mekoar de haande.
Toen'e weggung, zea Mans: "Doar he'j good an edoan."
"Joa," zei Graads, "mer a'j wier better wordt geet 'n oaln toostaand wier in."

Gerrit Dannenberg

Afbeelding
Nieuwe tafel? Maak hem samen met Mooie Tafels 4 uur geleden
Afbeelding
OV-ambassadeurs houden inloopspreekuur in Rijssen 5 uur geleden
Afbeelding
'Versiering' aan hekken bouwterrein Albert Heijn 20 uur geleden
De koeien houden de wacht bij de poasboake van Holterbroek. De komende dagen wordt daar nog hard gewerkt om er een mooie poasboake van te maken.
Speciale paasvurenroute langs Holtense poasboakes 21 uur geleden
Met de hulp van een leerlinge hijst wethouder René de Koff de vlag als startsein voor het verkeersexamen van VVN Rijssen-Holten.
'Zijn jullie al een beetje zenuwachtig?' 28 mrt, 14:09
Afbeelding
IVN houdt fotowedstrijd rondom het thema Lente 28 mrt, 12:06
Afbeelding
Nú is het moment om te winkelen bij Van Dal mannenmode in Rijssen 27 mrt, 20:19
Bart bezoekt regelmatig zijn ouderlijk huis en vrienden in Holten (eigen foto).
Bart Vermeulen reizende ster in artiestenland 27 mrt, 18:12