<SCRIPT SRC="//secure.adnxs.com/ttj?id=10195025&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>

Column: Stoppen

Iej kent vaste den bak wal.
Dokter: "En hoo völle sigaretten rook iej op nen dag?"
Kearl: "Vief päks per dag, dokter, mer allene noa 'n middag."
Dokter: "En wat doo'j dan 's moarns?"
Kearl: "Hoosten dokter, niks as hoosten."

In 't zekenhoes ma'j nit roken. A'j opereerd munn worden, kö'j 't beste stoppen met roken. Hoo kort ook, want noa 20 minuten wordt 'n blooddruk en pools wier normaal; noa 8 uur is de nicotine- en koolmonoxideconcentratie in 't blood halveerd en 't zuurstofniveau wier normaal; noa nen dag is der gin koolmonoxide mear in oew lichaam, noa 2 dage he'j gin nicotine mear in de hoed, kö'j better roeken en preuwen en noa 3 dagen haal iej makkelijker oam.

Silvia mos ehulpen worden an galsteender in 't zekenhoes in Almelo. Silvia zea: "Zon fijn zekenhoes! Heel deskeundige dokters, vreandelijke verpleging, mer één dinge veun ik toch wel heel roar: ik mogge al geentnit roken!"' Een ingreep steelden nit zo völle vuur. Ze hadden 'm heel makkelijk in sloap ebracht en hee har d'r niks van met ekregen. Silvia mös nog wal 'n poar dage bliewen vuur controle, har 'n dokter ezegd.

Noa de operatie veulden'e zich fealijk best wal good. Mer wat har Silvia zin an 'n sigaretje. De zuster köm vuur 'n bloodruk en dee 'n bäkn thee en toew kon 't Silvia 't nit länger harden. Hee leut zich heel zachtjes oet berre glieren met de blote benen in de Uggs, 't roo vest an en keek stiekem um de dure. Gin meanske. Silvia sliepstärten duur de gänge tot an 't zustershok. Twee vrouwleu zatten in de glazen etalage achter 'n computer. Op haande en knene kreup'e oonder de roete duur. Boeten zeug Silvia an de sigarette net of'e te lange oonder water was ewes.

Gut, 't was koold. Gauw wier noar binnen hen. De dure van 't zustershok gong lös. Silvia deuk dreks ne kamer in. De vrouwe in 't berre keek verwoonderd. Ssssst, dee Silvia. De zuster leup vuurbiej. "Wat door iej dan?" vreug de vrouwe den Jennifer hetten. "Ik doo stiekem roken." "Det wil ik ook wal," zea Jennifer. Eawen later lea Silvia bewerig in berre, mer non met 't tellefonnummer van Jennifer met de penne gaauw op de haande schrewen.

Dree keer daagns deden Silvia en Jennifer whatsappen. "Eawen friske loch happen?" schreef Silvia. "Joa, tied vuur 't rookoffer," reageren Jennifer dan. Achter mekoar kreupen ze duur de gänge, oonder de grote roete van 't zustershok. Dat hadden ze met mekoar toch mer mooi vuur trechte!

Toew Silvia net wier in berre lea, köm de zuster binnen. "Ik zet oe eawen in 'n stool, want 't berre mu'k verscheunn." Met dat'e Silvia oonder 'n oarm nam, sneuf'e: "Heb iej erookt?" "Nee, wattan?" dee Silvia nog. "Iej deankt toch nit dat ik gek zir," zea de zuster. "Vanof toew warren de zusters ineens nit mear zo vreandelijk," zea Silvia later tegen Jennifer, "Mer ik zir toch gin klean wich mear! Ik beslisse zelf wal wat good vuur miej is!"


<SCRIPT SRC="//secure.adnxs.com/ttj?id=10195025&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>
Meer berichten
 
Auto zoeker
<SCRIPT SRC="//secure.adnxs.com/ttj?id=10195036&size=160x600&promo_sizes=120x600&cb=[CACHEBUSTER]&promo_alignment=center&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>
<SCRIPT SRC="//secure.adnxs.com/ttj?id=10195026&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>