Columngejachterte

Het skriewn van kaantteaksten zo as in dit kreantje lik meujer as a'j zo deankt. Zelfs a'j een kleane vieftien joar ervaring hebt um vuur verskilnde blaadn columns maken, wor ik der nog aaltied jachterig van a'k wier een mailtje van de Tute kriege um wier viefhonderd weurde in nen kaanttekst te drukken. Oonzen learmeaster Han Pape bewearn toentertied det'e elken dag wal nen column kon maken. Non jea, ikke in ieder geval nit.

Nen kaanttekst is netuurlijk leefhebbrieje en det mut het ook vuural bliewn. Plichen he'k zo wie zo nen gloepensen hekel an, want dwang is nooit good.

Kaantteksten maakn dut een meanske mangs good. Iej koant fijn van oe ofskriewn. Iej koant

dinge dee at alleman wal zut mer votkik um het an de orde te steln. A'j hellig zeent, kö'j nen eande hard goan lopen, mear iej koant ook nen schoarpen kaanttekst maken woerin a''j der ene ongezoolten de woarheaid zengt. En het meuiste van columns is de'j zo'n betjen alns köant zeggen want de hoofdredactie neamp duurgoans gin verantwoordelijkheaid vuur de inhoold.

Nen columnist is het meeste te passe at de leu reageert en a'j nit oppast wo-j der nog greuts van ook. Ik veende trouwens det columnisten ook de taak hebt um skoarp oet 'n hook te kommen en um de woarheaid is ne moal good op pepier te zetten.

De meeste biejval he'k ooit ehad aower hoondeköttel-oargernissen. Vuural dee schaamteloze leu dee at 's oawends een hoond oetloat en dan heel miszeun van eur ofkiekt at 'n hoond opeens

'mut'. "Nee, dat doet ie nou anders nooit." Vot met det volk.

Mangs oawerweag ik um gewoon nen moal te stoppen. Det koomp dan vuural umde'k dan leu biej naam en toonaam heb eneumd en doar dan commentaar op kriege. Ik mur dus oart vuurzichter worden, want aanders krieg ik verskel met het ´thuisfront´ en nen bakkeajerd duur de roetn hen wil ik toch ook lewer nit.

Stoppen? Det zol toch jammer wean. Der zeent jums nog genog kaantteaksten te maken oawer

de gemeente, de duurgoans onbetrouwboare oawerheaid in zin algemeenheaid, oawer de fiscus dee at op 'n doer oew hoes in Box III weelt plearen, oawer de reante, oawer de Brexit en miskien de

Nexit, oawer baanken, oawer annemmers, oawer makelaars, oawer bleende leidslieden.

En oawer auto's, oawer duurzaamheaid en cirulariteit, oawer Eantersen, oawer Nijverdallers, oawer markante Riessenders, oawer vroger toen alns nog better was, of juust nit. Oawer het oonderwies, de learkrachten, de oolders met grote meunde richting de schoolleiding, oawer zunnepanelen.

Ach, genog nog um te skriewn. Stoppen kan aaltied nog.

Gerard Voortman