Column: Rotonde

Oet zelfbeskoarming jaag ik nen slOpel Crossa. Ik hebbe namelik nog wal nen zwoaren voot. Gin nood, vuur mie ginnen ontheffingspas of markeerde parkeerstea vuur 't hoes — Dat leste was trouwens wal welkom, want et lik mangs net of half Riessen precies bie mie vuur de dure wil parkeren. Mer ik bedole dat met ne rappere wage de postbezörger zol meanen dat ik een abonnement har bie et Centraal Justitieel Incassobureau. Nit dat ik nen adrenalinezuchtigen zin. Mer et is wal fein um mangs wat mear duur te jagen.

Har ik nen Audi, dan was ik denk ik ook heel wat frustreerder. Audi-rieders liekt mie een bepoald slag volk. Leu dee härter wilt as een ander mer net nit wied genog noadenkt. Want wo onbenulliger as iej iemand vuurbie pleart (en mangs nog hellig opzied anloert ook), des te earder zit iej achter 'n volgenden sloaperd. Kö'j et net zo good heanig an doon en gewoon wat earder van thoes goan. Der is ja ne maximum snelheid in Nederland. A'j härter wilt, goat mer noar Duutsland.

Dat brech mie trouwens bie een volgend punt. Een kruuspunt, haha. Nog slimmer as Audi-veurders zint leu dee as gin richting anwiezet bie rotondes. En doar he'w der akelig völle van in Riessen. Ja, rotondes ook... Doar zol et CJI es op mutten kontroleren. A'j dreekwart um ne rotonde wilt, kö'j volgens Duuts of Engels model richtinganwiezen: Duutsers jaagt halfrond en blinket vanof 'n vuurlesten ofslag. Britten knippert al VUUR dat ze de rotonde opjaagt noar links en as ze halfrond zint noar rechts (joajoa, in öar egene land andersumme). Net iets mear woark, mer wal dubbel zo dudelik vuur leu dee stoat te wochten. Ik magge dee Britten wal.

Oh, en dan is der nog een doarde slag: leu dee te lam zint um et steur lös te loaten. Dee stekt onder et dreeien letterlik mer enen vinger oet, um nog net eaven kort an den richtinganwiezer te veulen. Mosterd noa 'n moaltied, want dan zi'j al zowat van de rotonde of. Doar hef den anderen, oarmen weggebroeker in zinnen Opel Corsa helemoal niks an. Iej zint ja nit allene op de weg. Gratis tip tuskenduur trouwens: et is ró-tonde, van roteren, nit ron-tonde.

In Nederland is der skienboar ginnen vasten ofspraak oaver. Richting angeven mu'j sowieso, mer zelfs dat is vuur völle leu al ondudelik of te völle möaite. Op zien Duuts of Brits, dat hank van oewe riejskole of. En of iej zelf nen egoïstischen jan-hondekloot zint of nit. In dat geval maakt et nit oet of iej in nen Opel of Audi jaagt.

Martin ter Denge