Plat-emancipatie

De emancipatie van het plat geet verdan. Vaalt oe miskien nit dreks op, mer der is wal degelijk wat gangs. Fealijk is det ooit in Riessen begunnen. 'n Twentig joar terugge betaalden een gemeenteroad al ne lessenserie oawer het humoristische jeugdbook Jewilmke van Gerrit Kraa. Alle legere skolen in Riessen hebt dee lesriege vaste nog oarns liggen. Op ne eankele skole is der wat met gebuurd. Ik heurden doar lest nog een heelder leerling-getugenis van. Mer op nen hoop skolen is een stapel beuks en de lesriege in 't magazien terechte-kömmen. Vake is der niks met edoan en det kan'k miej wal vuurstellen. At nen learkracht gin plat dut én gloepens drok is, zit iej nit verleagn um nieje dinge.
Toch har een gemeenteroad doar geeld vuur oawer. Ongevear in dee zelfde tied begun een gemeenteroad ook met één keer in 't joar ne echte roadsvergadering in 't plat. Boeten Freesland is der nog nit enen gemeenteroad ewes den det ooit hef edörfd. Wál warren der gemeenteroadsleden hier vlak oet de buurte dee mega-hagelsteendomme dinge zeaden oawer de Riessens-Hooltnse dialectvergaderingen. Mer loa'k het doar nit oawer hebben. De officiële erkenning van het Nedersaksisch was een streppel ducttape um ze vuurgood 't moondwoark too te doon op dit dossier.
In Riessen he-w oons gelukkig nooit eskaamd vuur oons plat. Alwier een poar joar geleden steun Riessen een moal of dree achter mekoar blaank. Duur 'n hardn reagen leupen in het lege deel van Riessen de Hoar en umstrekken de kamers en keelders dree keer achter mekoar vol water. De gemeente wol moatregeln en vreug de brandweer um een rapport met moatregeln. Det rapport köm der en Henk Wolterink schreef der op as titel: "Het water löp woer 't lege is". Körter en better kö-j 't nit zeggen.
Een zetje terugge presenteerden Bouwbedrief Dura Vermeer oet Hengel een officieel veiligheidsfilmke in het Twents. Bedacht duur Tess Tijhof-ter Avest den doar op de ofdeling communcatie zit. Mooi oondertiteld en vuur alleman te begriepen. Strak woark van Dura Vermeer. De Brandweer Twente köm vurig joar met een niej beleidsplan. Elk hoofdstukke worden in-eleaid met een kort stukn in 't plat. Ook wier een officieel documeant met officieel en good plat der in. De brandweer dörft dit gewoon te doon. Nit köakeln mer eajer legn. Zo zee'w dee möage ook geane.
In 'n gemeenteroad begun Jan Berkhoff van de ChristenUnie in de leste vergadering zo mear in het plat een pleidooi te hoolden vuur platte plaatsnamen biej de invalsweagen: Riessen en Hooltn. Nit in plaatse van 't Hollaands, mer gewoon óónder Rijssen en Holten. Gewoon um te loaten zeen: zo neume viej oonze plaatsen zelf. Dee borden komt 'r non nog nit, mer gin meanske klaagnden oawer het platte pleidooi van Jan. At det gin plat-emancipatie is.