<SCRIPT SRC="//secure.adnxs.com/ttj?id=10195025&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>

Biej oons op 'n Biebelbealt

In het Catharijneconvent in Utrecht is d'r rechtevoort ne tentoonstelling met as titel: "Bij ons in de Biblebelt". Her en der zag iej doar anplakbiljetten van met een vrouwmeanske in de zöandeangse kleare: mevrouw Blankensteijn-Moree oet Dordrecht. 'n Innemmend meanske. D'r hebt froai völle leu met ehulpen um de tentoonstelling integer te maken. Ne hele prestatie, want hoe vake is het al nit gebuurd dat zukke leu zik de höare oet 't heuwd treuken umdat ze lachwekkend oet-eduusket wörden, as een soort deelnemmers van een weareldvrömd reservaat? Dat Wibo van der Linde vuur Tros Actua ne camera in de koplaampen van 'n auto leut bouwen um het Staphorster koarkvolk toch te können filmen? En vuur 'n poar joar ha'j den filmmaker Emile van Rouveroy van Nieuwaal gängs in Rijssen, den zik in alle bochen wrung um Riessenders as haatdragende leu dale te zetten. Mear ditmoal hoowt alle leu, dee ze op-etromd hebt um de expositie vol te kriegen, noarns spiet van te hebben. 'n RD-journalist Jan-Kees Karels schreef in 2013 nen 'open brief' um ees ne expositie te maken oawer de Biblebelt woermet samenstellers recht zollen doon an de geschiedenis, leavensbeschouwing, en maatschappelijke posit

Affijn, in Utrecht is het zo wied en ik veun het ne prachtige expositie. Doar wör een serieus beeld op-erop van de refo's, as ik ze efkes zo onearbiedig mag neumen. In de volle breedte. Nen hoop vrouwleu en keals dee in kotte video's vertelt oawer wat öar drif, wat ze meant en wat ze deankt. Iej zeet spleenternieje hoeskamers van krek getrouwde jongeleu, taleantvolle fotografen maakten schitterende foto's, prachtige schilderiejen oawer de Afscheiding en oawer de brede en de smalle weg, de reformatorische architectuur van de koarken, de mode van jongeleu in zoaterdeangse én zöandeangse kleare, het oonderwies, het gezin, neumt mear op. En op internet kö'j zeen wavukke leazingen d'r zeent en woenear.

Het dee miej good dat d'r ook ne plate höng van Bunyans Christenreis, van Albert Wessels, alwier nen zet oet de tied.

Het is een vervelend gebroek van vittende columnisten um ook an te gewen wat ze emist hebt. Ik doo d'r dus ook an met: hier en doar zee'j (hoaste per oongelukke) een koarkörgel, dewiel d'r zukke prachtige - en kostboare - örgels te zeen en te heuren valt in de Biblebelt. En örgelmuziek, in Riessen he'j twee componisten dee mooie muziek eschreven hebt, Dick Sanderman en Cor van Dijk. Of nemt de organisten, volgens Jan-Kees Karels, de dreagers van 'het vierde ambt'.

Ik zol benaamd de Riessenders willen adviseren um d'r hen te goan! Of mu'k d'r oe hen sléppen …?

Gerrit Kraa


<SCRIPT SRC="//secure.adnxs.com/ttj?id=10195025&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>
Meer berichten
 
Auto zoeker
<SCRIPT SRC="//secure.adnxs.com/ttj?id=10195036&size=160x600&promo_sizes=120x600&cb=[CACHEBUSTER]&promo_alignment=center&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>
<SCRIPT SRC="//secure.adnxs.com/ttj?id=10195026&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>