<SCRIPT SRC="//secure.adnxs.com/ttj?id=10195025&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>

Column: Ofwasken

Dissen tied is de tied van de technische vuuroetgaank. Zengt ze.

Elektrische taandebössels, elektrische luxe waangs, met de vleegmesiene de hele wearlnd oawer, robotjes in de gezondheidszorg. Viej leawt in de tied det alsn dreks maakbaar mut wean en a-j wat bestelt, mu-j het hoogoet 's aanderdaagns in 't hoes hebben en betaaln doo-j met de tellefon.

Iej heurt nog de leu kuieren oawer Uber, Tesla, Amazon, Netflix, zunnepanelen, weendparken, domotica, kookeilanden, commercieel vleegn noar Mars of de moane, lege reante of zelfs negatieve reante, fietsvakaanties in Kuala Lumpur of op IJsland.

A-k ne kleane vieftig joar terugge-kieke, kom ik oet biej min groffa, Jewilm van de Klitse. Het was een eenvoudig man, pette op, hard woarken, gin riejbewies, een man van earplen, sloabonen, duurkok en zoerkool. Daangs ne piepe en zoaterdasmiddaangs ne segoare.

Hee dee alns op de fietse, was 100 proceant duurzaam, circulair en grootndeels zelfvoorzienend, een poar beesjes op 'n stal, nóg vearder in de tied terugge een poar bign, een poar hennen, een poar skeppel laand vuur de rogge en biej 't good nen grootn greuntetuin.

Achter 't hoes steun zon zwartgeteard skeefzakkend potdeksel skuurkn met iezerne golfplaatn met rikkepöale, hoolt vuur 'n kachel, nen fossen kleane heultjes, täkke, rieze bessems, ne verzameling iezerdroäks, spiekers, lätjes, towkes en nog völle mear. Niks votgoojn, alns bewoarn, iej weet nooit.

Min gropmoo wasken in zonnen fenuuspot van graniet met een binnenwoark van iezer of aluminum, nen haandbedeenden wringer, waslienen en tuugpinnen en het reuk allemoals fris.

Ofwasken deden ze in een klean teiltje water met een betjen broes, nen teelder, nog ne teelder, nen leppel en ne vorke, nen jus-sleef. Een betjen yoghurt noa, zo op 'n earpelteelder. Dessertschaaltjes hadden ze nog nooit van eheurd.

Det is heel wat aanders as woer-e viej in 't hoes het ofwasken doot. Met de nieje kökne den a-w vurig joar kregen, dee biej oons ne ofwasmesiene zinnen entree. Zonne ofwaskemesiene heb ik altied tegen-eheulden. Onzinapparaten, noarns vuur neurig.

Ik zir een ennigsen in 't hoes den der zo oawer dech. Het is inpakken, ne teblette der in, een poar knöpkes indrukken en kloar zi-j der met. Ne halve woarheid is ne leunge en dus det gemaksverhaal van zonne ofwasmiese ook. Want at dee ofwasmölle trechte is, mu-j det deenk oetpakken. Völle leefhebbers heb ik doar nit vuur. Koomp biej de-j pannen nog aaltied appart mun hooln en plestieken bäks en aandere dinge met een reanke nog met ne theedook noa mun.

Der geet niks vuur zo as mien gropmoo vroger ofwasken. Ze was met 6 minuten kloar. Viej doot der wal 10 minuten oawer: inpakken en wier oetpakken.

Alle vuuroetgaank is nog ginne verbettering!

Gerard Voortman


<SCRIPT SRC="//secure.adnxs.com/ttj?id=10195025&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>
Meer berichten
 
Auto zoeker
<SCRIPT SRC="//secure.adnxs.com/ttj?id=10195036&size=160x600&promo_sizes=120x600&cb=[CACHEBUSTER]&promo_alignment=center&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>
<SCRIPT SRC="//secure.adnxs.com/ttj?id=10195026&cb=[CACHEBUSTER]&referrer=hartvanrijssen.nl&pubclick=[INSERT_CLICK_TAG]&postcode=745,746" TYPE="text/javascript"></SCRIPT>