Column: Quiz

Nen verjoardag kan smangs vrömd lopen. Iej hebt verjoardeage woer de vrouwleu ampat zit en de kearls idem dito. Iej hebt ze ook woer alns duur mekoar zit. Iej hebt verjoardeage dat het blif biej geteut oawer beeste en kieskes.

Mear mangs geet het ne verrassende kaante op. Het gesprek köm op "De slimste mens", wee'j wal, een TV-programma met een oonderdeel "het collectieve geheugen". En toen begun het gekuijerte oawer het collectieve geheugen van de Riessenders. Wee keump as eerste biej oe in de gedachen as het geet oawer bekeande leu? Wee steet boawen an as het geet oawer bevuurbeld nen dommen ossen of 'n klook vrouwmeanske? En a'j dit least in Hoolten of Nijverdal of zo, kö'j doar ook wal terechte met dezelfde vroagen al krie'j dan aandere antwoorden. En viej goat efkes oet van wat euldere leu, vuur hetzelfde geald kan de volgende genneroatie hetzelfde spelletje spöllen. Wee steet boawen-an - viej hooldt het biej pakweg de leste 50 joar - as politicus? As dokter? As middenstander? As oondernemmer? As schoolmeaster of leraar? As plietsie? As caféhoolder? As borgemeaster? Ene oet 'n Stoom? As (stads)boer? As typischen Riessender? (van het type "wat za'k zeggen, de bokse wier oet, de boske wier an"? As keal woer ze de meeste anekdoten oawer vertelt, as spraakmakende figuur? Iej köant het ook doon met iets aans: de meujste stea van Riessen? Het meujste hoes? 'n Meujsten weenkel? En zo verdan. Oonderdoems nit vergetten of en too nen hap van het taartje te nemmen, of nen slok oet het gleaske. Of oppassen da'j oew gehemmelte nit braandt vanweage nen te heten bitterbal.

Oet het nogal gevarieerde gezeelschop woer ik dissen proefballon opleut was het resultaat: domiej Lamain, domiej Van Tuyl, Renger en Otte, Dik Wessels en Herman Nijhoff, Spekhorst en Poeierhenkie, menear Auke, De Leeuw en Kontje, Getjan met de kètne en Hoflaand, Wilm van 'n Haasen en De Pauwe, Oabramsdika en Wilm van de Krone, Pastoor Peters en kappeloan Van der Hoorn. De Diele en Bats van Moanenschien.

As meujste stea köm d'r de Pelmolle oet met 'n zoomp vuur de dure en as meujste sprekwoord 'de domste boern hebt de dikste earpl'. Tja, het gung d'r mangs hooglopend an too, mear het gung efkes iets aans as oawer de kwoalen, oawer het wear, oawer dat Gediene ne nichte was van ach dat wee'j wal, van Graads, den aait dit en dat…

Gerrit Kraa