Column: Hendrik

Hendrik is geboren. Ik kenne Hendrik zinne oolders nit, mer ze zeent heel bliej met Hendrik. Aans zo’j het nit good veenden det ‘r nen leawensgroten opbloasbaby biej oe vuur an de weg wordt eplaatst.

Hendrik woont op ’n Lechenboarg. Mear wee'k nit van um. Toch wa’k ofgelopen wekke bliej toen’k leuze det Hendrik geboren was. Det köm vuural duur den moojn naam: Hendrik. Nen echten, stoeren jongensnaam: Hendrik! En ze neumt den jongnkearl ook zo, want vlak vuur dee grote opbloaspoppe steun dree brödjes met “Hendrik”. Ik zochen nog noar één brödje woer vaste wal op zol stoan: Noud of Wesley-Jay. Mer nee! Alledree brödjes: Hendrik.

Ik heb zelf nen zönne den Jan het. Ik heb vake oet munn leggen det den naam ginne foute wes en de’w um ook zo neumden. Gewoon umdet min va ook Jan hetten. Trouwens, min breur ook en ne groffa en dree eums en minstens dree neawers; almoal Jan. Minne aandere groffa hetten Getjan (Gerrit Jan op zin Hollaands) en ik heb minstens dree neawers én nen eum dee Gerrit heet. Heel praktisch.

Het hef lange de gewoonte wes um wichter te verneumen noar de oale leu. Vake kree’j dan zonne mooie serie duur de femiliegeschiedenis hen: Dieks-Wilm-Dieks-Wilm. Toen ’t zicht van de leu op de wearelnd alverdan breder wörden, kömmen der aandere naams in de mode. Dan kree’j dit riegelke: Dieks-Wilm-Dieks-Wilm-Liam. En um inclusief te bliewen: Hanna-Gerre-Hanna-Gerre-Tess.

'n Naam de’j oewn zönne of dochter doot, hef niks te maken met de persoon den der later oet greujt. Naams hebt heel völle te maken met het geveul wa’j der zelf biej hebt. Volslaagn on-earlke, mer zat iej in de klasse nöast Esmeralda, ne gloepense hapscheare; weanig kaans de’j oew dochter ook zo neumt.

Splinter, Storm, Charles-Victor, Lynn, Noor zeent echt allemoal slim sympathieke leu. Toch veen ik het ne mooie ontwikkeling det de Hollaandse naams ook op ene of andere manere wier teruggekomt. Ik kenne een meaken det Hanne het. Mer ook ne Janne. En ne Hannah, wal met ne ‘h’ der achter, mer toch… Ook nen Mance…a’j ’t oetsprekt kleenkt ’t zelfde as Mans. En nit te vergetten Gerhard en Willem - biej oons in ’n Hagpad woonden vroger Gerrad van ’n Troos en Wilm van ’n Steek…

Het is heel persoonlijk, mear dee gewone naams geewt miej toch een good geveul. Hendrik zal groot worden op ’n Lechenboarg. Op een mooi boerderiejke met sikke, schöape en ’n ponypeardje um ’t hoes. En ne zee van ruumte um lekker vuur boeten te spöllen.

...Hendrik! Ik zir bliej det’e der is.

Gerrit Dannenberg