Column: De jeugd

De jeugd van rechtevoort: allemoals jongs en meaks, zo at het van Skeppingsweage of an is wes. Hedentendage ma’j dat nit mear zeggen want der zeent talloze varianten biej e-kömmen, en o wee aj det in twiefel trekt.
Ik wil het oawer de jongs hebben. A’j biej kapper Joop zit en mangs good lustert en good kiekt, dan meujt het der miej van. Het is nit mear ‘doot der mear nen bol of’, of ‘de oorn vriej’ of ‘nit zo kort as de vurige moal’. Of Joop det allemoals kan onthoolden... Der komt non van de keurig geknipte kearlkes de kapperszaak ín. Zo op het oge mankeert der niks an eur kapsel, mear het mut eawn worden biej e-knipt. En dan teuwelt ze met euren i-phone en dan loat ze plaatjes zeen van ‘zo mut het’, met oetgebreaide instructies en maneerks der biej.

Het zeent ook van de jongs dee at keunstschilder/leraar Henk Roosink opvalt. Ik kömme Henk tegen in det mooie natuurgebied tegen-oawer Hendrikus van de Tojje. Viej hadden het oawer oolderwetsche authentieke onderwijsleu as Wim Ligterink den at oons op de Mavo al inpeppern da’w zeunig mossen wean met water, het lecht oet mun doon a’j oarns nit zeent, achter ne vrachtwage bliewn op de autobane, want det bespoart benzine en iej zeent den klemmert in de loch dan wál. Ligterink nöm oons met het veeld in, lea op ’n boek met speegelkes te kieken oonder nen paddestool, bracht oons het begrip ‘biodiversiteit’ biej, want gin biejn, gin goo vruchten. Woerumme sloabonen in ’n weenter en zoerkool at 30 groad vuurboeten is. Koopt de greuntes van het seizoen. Ligterink was de tied vear vuur oet. Nen hoop jongs en meaks dee at met hum metgungen ’t veeld in, lachen der ook wal umme, mear ze gungen wal met.

“A’k ze non met nemme het veeld in dan vroangt ze miej of de beande van eure fietse ook smearig wordt,” zea Henk. Vermoedelijk hebt ze van dee Cortinafietsen met lechte beande en dee munn netuurlijk skone bliewn en der zol eens een griwken zaand tusken de speekn können kommen.

Of ‘maar worden dan mijn schoenen niet vuil meneer?’ doelend op eure nieje spierwitte Nikes dee at elken oawend oonder ’n kraan goat en met Jif wordt bespreankeld want ’s aanderdaangs mun ze wier as niej lieken.

Vermoedelijk ook jeugd dee at driete-verweand zeent en dee at de weenterdag per se aardbeien op de stoete weelt, oew gin bonen oet eigen tuin et, umdet ze miskien oart te dikke zeant ewörden of der toevallig een dröadken in zit. En dee at 4 moal per joar een stedentripje maakt, en met de vleegmesiene vuur eur 39,-- noar Milaan vleengt um de leste mode op te snoewen.

Iej mangt non zelf bedeanken biej watvonnen gender at zukke jongs biej heurt.

Gerard Voortman

Meer berichten