Column: Citroën 2CV

Wonnear begin iej oold te worden? A-j verdan oawer vroger begint te kuijern? Of a-j aandern geveulige verhaaltjes vertelt oawer de klookste en potsigste kleanwichter van de wearlnd en foto’s op de tellefon loat zeen? Of ne bucketlist maakt met dinge dee-j nog weelt doon umdet ‘r nooit van ekömmen is?

Mer eerst eawen dit. Eagenlijk veen-k van miezelf da-k best de zunne in ’t water kan zeen schienen biej ‘n aander. Ik kriege ginne stekke in de zied at möage - dee-k ooit in de klasse har - miej in grote auto’s vuurbiej jaangt. As ze met hard woarken an ‘n top van ne grote oondernemming stoat en mear geeld verdeent dan ze op köant maken, deank ik vake: het is oe van harte egeund. Behalve vanwekke.

Ik fietsen noar ’n Oosterhof toen Lianne van Heek-Schulenburg miej met nen vaart vuurbiej jachen oawer de Reggesingel; nota bene in ne steal mooie eande. Lianne is oonderdoems ne friske moo met wichter en woarkt biej Steenbergen, de schoonzaak woer ‘t zelfs kearls geane hen goat.

En ineens wus ik het wier: ik heb nog nooit in ne eande jach. Lianne zweejden vreandelijk en oet het knalpiepke retteln det typische eanden-geluud. Wat nen moojn auto. Jan van Knien zea ‘t vroger al: “A-j skoolmeaster wordt, dan goa-j netuurlijk ne piepe roken en in ne eane jaagn.” Noh jea, dee piepe is al lange oet de mode. Mer de eande hef ‘t lenger vol-eheulden.

Wat heb ik det toch aaltied ‘n intrigeernd weagntje veunden. Seempel mer doelmatig. De zittingen kon der met enen ruk oet en dan ha-j tuinsteule. Een roetenwisser was ook zoonder stroom prima te gebroeken. Der zat nen slinger biej at-e nit wol starten. Skakeln gong met nen perrepluustok in ‘t dashboard. En vearen! Kearl-an-gen-eande wat vearen! Een Citroën 2CV wes dan ook emaakt vuur Fraanske boeren dee met ne kiste eaier op de achterbaanke noar de moarkt mossen oawer slechte boetenweagen met depe koelen en geater. In de lelke eande gong gin eai kapot.

Een poar joar terugge ha-k der hoaste ene koch. Ze zeent al geent zo heel deur. Mer jea, twee auto’s biej de dure terwiel a-j ze allebeaide nit dreks neurig hebt. En met ne eande op vekaansie goan...Vroger kon det. Dan nömmen ze zelfs nen zak earpel met noar ‘t Gardameer.

Ik wazze vergetten hoe ‘t veulen, mer toen Lianne miej vuurbiej-roazen, wa-k ineens oolderwets jeloers. Ik wil ook zonnen auto. Det kneep nog duur ook. Volgens miej wo-j dan oold…

Gerrit Dannenberg

Meer berichten
 
Auto zoeker