Column: Elektrisch

Van nen hoop nieje dinge dee at langs komt, hool ik miej duurgoans lewer wat ofziedig. Det is van nature netuurlijk oart Twents: de katte oet ’n boom kieken, eawn kieken wat ’n aandern dut, loat ’n aander de keenderzeektes mear eerst ervaren en dan haak ik wal an. Of nit.

Mangs he’j de keuze nit en wo-j edwungen. Zo vergung het miej ook biej de verplichte keuze van dee hoge hearn in dee glemmige en glazige hoofdkantoren. Dee weelt C02-vriej wean in 2030 en dus wör ik edwungen um doar ne belangrieke biejdrage an te leawern’. Zo verpakt ze det duurgoans as ze oe dwingt.

Nen elektrischen auto. Nee gin hybride mear 100 proceant elektrisch. Nit mear pochen dej ne’n 6-cylinder V6-motor hebt, ook nit mear pochen oawer dree dubbele knalpiepen. Ook nit mear stoer doon de’j het spruitstukke hebt oet-eboard of de braandstofverstoewers hebt oet-evield. Ginne 6- of 8-traps automaat, nee gewoon net as vroger de pientere-pookjes-dafjes, een soort variomatic. Gin gas gewen biej het stoplech. Alns stille a’j stille stoat. Nit mear tanken biej de Neus, gin airmiles mear, gin zeagelkes vuur haanddeuke of aandern sitsenkroam. Nit eawn mear nöaln met dee meaks biej de kassa. En vuur de leu dee det doar nit koant loaten: ginnen gehaktbal, een päkn segretten of ne dikke plakke sukela vuur oonderweg. Nee, gewoon biej oe an ‘t hoes tanken oonder ‘n carport, of biej Fastned an de snelweg of biej dee drieterige laadpöale dee at nit opskeet. Of a’j pech hebt een half uur wochen tot de’j an de buurte zeent. En verdan rekkenen. Hoe vear kan ik, hoe koold is het, want dan verbrok’e mear stroom. Mear wal wier nen standkachel den a’j met oewen i-phone koant bedenen. Mear ook gin gefimmel mear met bougies, ginne v-snare, ginne distributie-reem, ginne knalpiepe, ginnen braandstoftank, ginnen radiator, gin geduzel van slangen en spil in ‘t vuur-oonder, ginne moojn dieselroffel, gin V70-benzinemotorgeluud, ginnen dynamo, ginnen kruk-as, ginne lekke koppakking, gin motoröllie mear (!!) en nen heeln aandern motor den at dreks 100 proceant koppel hef. (Non doo’k net o’k der verstaand van hebbe) Det is wal mooi mu’k zeggen, want dan stoa’j biej de stoplechen nöast zon Golf GTI-tje met nen jongen gast en zin kammerroad te gassen um te kieken wee at het gaauwste vot is. Dan he’k wal gloepens wille de’k ze er op de eerste 100 kilometer dreedubbeld oet jage.
Ik zee het duuster in vuur de garages. Zowat gin oonderhoold mear, gin V-power-öllie en vervangen van oonderdeeln dee at sliet. Hoog-oet een betje roetnwisservloeistof, rem-öllie of nieje beane. Mear het jach zo mooi, oh wat jach det mooi. Ech woar: het jach gloepens mooi. Dee baze van oons hebt het beste met oons vuur. Ech woar.

Gerard Voortman