Foto: Jan Joost

Column: Hoonde-Hollaands

Nen hoop leu doot Hollaands met de wichter. En det netuurlijk met de beste bedoelingn. Ooit is det stoark an-eroadn duur opvoedkundigen in de Libelle en Ouders Van Nu. ‘t Is gebuurd… Hollaands doo’j met oew wichter umda’j hopt det ze zik better köant redn in de maatschappij. Niks mis met. Mer is ’t oe wal ’s op-evöln det völle leu ook Hollaands doot met ’n hoond?

Oet een oonderzeuk van het blad Onze Taal blik det roem 99 proceant van de leu ook Hollaands dut met aandere deers: katn, parkietn en hamsters. Volgens Onze Taal kuijert ze met de deers in de taal woer ze het meeste van hooldt! En doar geleuw ik niks van. Leu dee zelf ’n leawen laank plat deedn, kuijert Hollaands met de wichter umdet ze déankt det de möage doar later mear an hebt. Ook ‘n hoond en de katte munn bliekboar wordn op-evood, dus zeg iej op opvoodkundigen toon at ’n hoond drit woer det nit mag: “Wat doe jij daar?” Of at Joeri nen peareköttel opvret: “Laat dat maar voor de grond liggen Joeri!” Zuwer opvoodkunde.

Mer der is hoppe. Iej hebt grootoolders dee zelf aaltied plat met de eagne wichter deedn. Juus dee köant de kleanwichter een weardevol cadeau vuur ’t leawn doon duur plat met ze te doon.

Ik zol zegn tegen de Oolders van Nu: doot vuural good Hollaands met de wichter, doar wordt ze nit slechter van. Doot desnoods Hollaands met de hoesdeers. Mer loat de grootoolders mooi plat doon met de kleanwichter; hoe mear taaln a’j leart, hoe better det is. Een aander groot vuurdeel zol wean at wichter nen hoop plat heurt kuijern. Doarumme is ’t ook heel good det oolders en grootoolders zo völle meugelijk plat bliewnt doon oonder mekoar.

En ook mooi zol ‘t wean det de grootooldn ook wier good plat doot met ’n hoond, de katte, ’t knien, de eandn, de kalver en de beeste: èllèh! vot-vot! truuk-truuk! piele-piele! kies-kies! prrrrrr!

Zo krie’w wier ne hele mooie meartalige situatie: wichter leart good Hollaands van de oolders én um zik hen heurt ze wier heel völle plat. Dan hebt ze wat te kiezen, want met allene mear Hollaands vaalt ‘r niks te kiezen. En oonze möage hoownt ’t toch nit slechter te hebm azze viej indertied? Het jonge volk zelf wil wal. Nemt dee meidn van JENIDO. Dee maakt een prachtig spel met honderden Riessense wöare. Twee grote vuurdeeln: op ne spölse manere plat learn en wat ‘t opbrech is vuur Afrika. A’j doar nit bliej van wordt...

Dreks koopn!

Gerrit Dannenberg

Meer berichten
 
Auto zoeker