Afbeelding

Column: Eelsenerstroate 32

Algemeen

Dikke vieftig joar geleedn woondn ik op ’n hook van de Eelsenerstroate en de Rozengaarde. Dé readn det ik dit gebied van oolds een betjen kenne en belangstelling vuur hole.

Tegenoawer oons ha-j het skoonweenkelske van Willem van de Waander. Vuur an de weg een vuur dee tied een niejmoods vuurgewelke, dan de etalage, een stukke weenkelruumte en doar achter woonden Wilm en Toos. Het is allemoals vuurbiej. Op dit moment zit der ne weenkel in met heurapparaatjes en doarboawn zit ne naamgenoot van miej: Gerbert Voortman (35). Ik wol weten wee at hee is, oet watvon nöst hee koomp en wat’e daangs vuur de kost dut. Iej zeet hum zowat elken dag langs kommen met steal mooie foto’s. Doar wo-k mear van weetn.

Gerbert mut hebn edach: ik wil de foto Zandvoort van vroger worden. Iconische plaatn maakn. Gin foto-rulkes, fotoalbums, statieven, fototoestellen met blitsleampkes, nee gewoon mooie plaatn maakn en mear nit. Der zeent rechtevoort mear fotograawn as ooit. Alleman hef zon i-phoontje woer-a’j een heeln dag köant knipn en duursteurn. En dán? Gewoon votgoojn. Fealijk jammer, want nen fotoalbum is völle meuier. Mear wee maakt der vandage an ’n dag nog een foto-album?

Gerbert is van ’n lang Wilm, zin moo is van VenNoort en der zit nog oart in van een Kuupsgeslachte, mear wieter kom ik nit. Gerbert hef det paand op de boawnverdeepige wier terugge-brach in ’n ooldn stiel. Dunne balkentjes in de kappe, iej schrikt der van zo dunne, mear het functioneert al zowat honderd joar. Gerbert huurt het paand van Porsche-leefhebber Harm Bos. Biej dissen de oproop an Harm um ook ’n vuurgéwel wier terugge te brengen in ’n ooln stiel. Der zeent wal foto’s van, Harm; kö’w oe wal an helpen.

Gerbert is op-ebrach in de Nederlaandse sproake en speult in de vrieje tied met zinn oonderhuurder Martin ter Denge (literair platskriewer en columnist in disse kraante) biej ’t muziek. As ze dan biej de reppetities an ’t skap zatn, kuijern alleman plat en zee nit. Tehope besleutn ze om dan ook mear plat te goan kuijern. Ik mur earlke zegn det Gerbert det heel mooi dut, mangs een Eanters woard der duurhen, mear det lig an Martin want det is feaitlijk nen halven Eantersen.

Iej goat vaste nog mear heurn van Gerbert Voortman. Hee wil nog workshops hooldn vuur mobiele tellefonfotografen, hee is anjager van de platte podcast WATATA, hee maakt foto’s vuur Potje en aandere grote bedriewe, hee héf wat gemoedelijks oawer zik.

Gin kemoosjes, gewoon mooie plaatn maakn.

Gerard Voortman

Afbeelding
IVN houdt fotowedstrijd rondom het thema Lente 30 minuten geleden
Afbeelding
Nú is het moment om te winkelen bij Van Dal mannenmode in Rijssen 16 uur geleden
Bart bezoekt regelmatig zijn ouderlijk huis en vrienden in Holten (eigen foto).
Bart Vermeulen reizende ster in artiestenland 18 uur geleden
Vlnr: Dick Keizer, Henk Plas, Gerrit Koster, Herman van den Belt, Wim Janssen.
Noordermannenkoor zet jubilarissen in het zonnetje gisteren
Met elkaar netwerken en genieten van een drankje, kaas en worst. Kijk voor meer foto's op hartvanrijssen.nl
Netwerken met kaas en worst gisteren
Philip Dröge is historicus, columnist en journalist.
Philip Dröge over een vergeten stukje van de Nederlandse taal 27 mrt, 10:00
Afbeelding
Koffie en Klets in De Bron in Enter 27 mrt, 08:06
Afbeelding
De Welle sluit sportinstuif-seizoen af met springfestijn 26 mrt, 17:58