Column: Gezoond

Kortens kreeg een Deensen voetballer, Christian Eriksen, 29 joar, oonder de wedstried nen hartstilstaand. Duur dreks te reanimeern is ‘t allemoal gelukkig good egoan, mer dán begeent wier dee komkommertied–discussie oawer de vroage of sport eagenlijk wal zo gezoond is? 

Netuurlijk zeent ‘r slim ongezoonde sporten, vuural woer nen hoop geweeld an te passe koomp: motorisch geweeld biej autoblubbering en lichamelijk geweeld biej kickboksen woe’j zelfs scha an de harsens van köant oplopen. Der zeent nog wal völle mear gevoarlijke sporten. Keaihard wielrennen is ook nit gezoond; dee wielrenners hebt vake de hoed kats verzoerd en hebt nauwelijks weerstaand. Mer ook een rally Paries-Dakar: steal ongezoond um in bloodhette dage laank duur ’t zaand en de weuste te jakkern. A’j det neet eweand zeent: begint ‘r neet an. Iesbearen in ’n zweet jaagn op de noordpool en pinguïn-eaier zeuken op Antarctica; nooit an beginnen. Doar kö’j vuurboetn al geent fesoenlijk een neuze oetsnuten. Mer det wordt wal alverdan better met dee klimaatveraandering. 

Mer eagenlijk geet ‘t aaltied um het nemmen van onverantwoorde risico’s. Schoonwal: risico’s en kaansen zeent heel betrekkelijk. Viej deankt ‘r neet alle dage an, mer in Eanter is de kaans grötter um een vliegtuig op ’n kop te kriegen as oonder ’n trein te kommen? Ne mooie voestregel is da’j het gevoar nooit munn opzeuken. A’j aaltied an de veailige kaante bliewt, kö’j röstig nen boarg op klimmen. Zelfs op oew buurte stoan wochen op de Mount Everest is verantwoord, a’j het gevoar mear neet oetdaagnt. Foebaln is ook neet gezoond a’j aaltied kats oawer oew greanzen hen goat. 

Mer vake noar foebal kieken is ook heel ongezoond. Iej zakt dale in de e nen grootn bak chips, keze, dreuge worst en beer vuur oe en dan mear zitn en allene of en too in de bene at ‘r ne goale wordt emaakt. Vuur de gezoondheaid zol ’t fealijk het beste wean at ‘r allene mear oefenwedstrieden warren tusken Ajax en het achtste van Excelsior. Zuk soort wedstrieden hooldt de toeschouwers in de bene.

Verdan in beweaging bliewen is trouwens aaltied good. Mear ook det mu’j nooit oawerdriewen. Oaweral woer “te” vuur steet is nit good. Behalve te-vreadn en te-quila, zengt de leefhebbers van nen stewigen borrel dan.

Nee, te völle is nooit good.

Zelfs te völle kóffie kan heel gevoarlijk wean. Kortens is der in de hawen van Rotterdam nen kearl estörven an koffie. Hee kreeg ne bale van 500 kilo op ’n kop.

Gerrit Dannenberg