Foto: Gerieke ter Denge-Pluimers

Platte column Itialianen

Verleden wekke wa’w in Napels, de geboortestea van de Barok. Dat was good te zeen an alle gebouwen doar. Oaveral frutsels en tierlantijntjes en boagkes en poerkes an de pleisterde gevels in zachte roze en gelle kluren. Iej keken oe de ogene oet.

Italianen stoat der um bekend dat ze slim op oeterlik zint. Onzen B&B-gasthear zea zonder skaamte dat hee minne höare zo mooi vund en zinne vrouwe ook. Leas iej met, Kapper Joop? Ferrari, Lamborghini, Maserati, allemoal Italiaanse opsmukkerige wagensoorten, woer’j op stroate flink de blits met könt maken.

Woer’j dee Italianen ook wal met köant vertrouwen is kleare. Armani, Gucci, Prada, alle grote bekende klearmoarken komt oet Italië. As et mer mooi en glad en stielvol is en vuur ‘n pronk. Dat kent ze!

En dan zint ze ook nog es heel drok op etten. Italianen ett Italiaans. De rest ‘is gin etten’. Hebt ze ook allerhande maneerkes umhen. En a’j dee neet kent zi’j nen groten barbaar. Caffè is espresso. Zo stoark da’j et met ’n tip van een leppelken mut nippen. Nen Americano, dee verdunde plörre? Veult der oe an. Cappuccino noa ’n middag? Ai mamma mia, da’s vleuken!

Zelfs kuieren doot ze met völle vertoon. In Nederland he’w Nederlandse Gebarentaal. In Italië hebt ze dat geheels neet neudig, want doar kuiert iederene met de handen. En noa al dee espresso’s valt öar tehope de jacht op de hoed en wordt ze krang in de kop.

Dan hebt ze dee geboaren ook neudig, want dee opsmukkerige gebouwen stoat zo kort op mekoar dat der verdan verkeersopstoppingen zint. Et is der één gewemmelte en gekneisterte van krakkemikkige auto’s, scooters, vrachtwagens, motoren en dreewielers dee’t oe links en rechts en vuur en achter um de hoed skeett. Parkeren doo’j tegen de mure. Neet der nöast. Der tegen. Vuurrang mu’j nemmen. Duur ’n snoeten half op de weg te stekken en der oe heanig tusken te drukken. En flink met de handen te zweeien en op ’n toeter te houwen. Doarumme hebt alle voortuge dukken en butsen en krassen. Vuur dee deure auto’s is geheels gin ruumte.

In de restaurants doot ze oe met allerhande maneerkes serveren. Mer op de wc’s zit ginnen bril en mu’j mer gewoon halfslachtig in de richting van ’n pot van oe of miegen. En op de stroaten is et der enen kroam van alle ofval wat ze zo van zik ofsmiett.
A’j zo drok zint met noar oezelf in ’t spegel kieken, zee’j neet wat vuur nen kroam of et um et hoes is.
Feitelik zi’w allemoal een betten Italiaans.

Martin ter Denge 

Meer berichten
 
Auto zoeker