Foto: Gerieke ter Denge-Pluimers

Platte column: sterspöller

Umdat ik totaal gin bal- of richtingsgeveul hebbe en et strategisch inzicht van nen visstick, meanen ik vanof min zunnige dakterras op Tenerife es wat chauvinistisch sentiment op te doon en et sport-blad van de NOS lös te trekken.

Eerst tachtig interviews met frustreerde vootbalspöllers. Kats emist dat Nederland mos, want ik har vuurnamere dinge te doon. Mer skienboar versloeken et Nederlands elftal zik kortens finoal in nen appeltje-eitjewedstried tegen Zwartenboarg ofwal Montenegro ofwal Crna Gora (Tsernagora, leart dat noe es). Machtig mooi land trouwens, anroader! Zelfs wat landskop angeet hebt ze et al better vuur mekander. En wiej mer meanen dat Twente zo mooi is. Mer dat is een ander verhaal. 

Op ’n lesten knieperd bleken onze jongs net ’n lesten oadem te missen um et of te maken. Blievt dan mer in hoes jongs. De brandende Qatar-zunne was sowieso al niks vuur de kleinzerige vootbalelite. Wat was der trouwens ook alwier met slavenarbeid en onder helse umstandigheden stadions bouwen? Misskien een poar klurige skeuntjes an op et veld, dat is nog es een protest.

Mer onderwiel poltert de Nederlandse ponypeardjes gewoon met een stukken gember in ’t gat parmantig duur de kwalificatieweide. Want verontweardiging dut et eaven good vuur de kamera’s en joa et is een slim spul, mer iej mut neet verdan blieven drammen. Noe wee’w et wal. De ARBO doar hef gewoon andere richtlienen. Volgend joar lache wiej der umme en Kein keloel, Fußball muss sein. Alloh jongs, stoten met den earpel.

Kommende wekke mut ze tegen de Noren. Dat wördt niks, want oargens verstökken op de tweede bladziede achter honderdveertig interviews met zoere godenzöns stund een artikel oaver skaatsenrieder Nuis. Den had et op zinne hoge noren ook al net neet eredt op de 1500 meter vuur ‘n wearldbeker. ’n Tweeden nationalen greutsheid van et vootstukke pleard, skaatsen kö’w ook al neet mear! Vuur televisie wier interviews met knarrige knapen. Gelukkig is et in dee sporthalle in ieder geval neet te hete, dus hove wiej ook neet mear noar Qatar te verwiezen.

Toen nog een artikel oaver Van Barneveld. Den had met pielkessmieten nöast de priezen egooid. En Versloeken verstappen zik en wör tweede achter Hamilton. Wat ne oarmood. Nederland stelt op wearldniveau gewoon as vanolds wier gin driete vuur.

Toch is der enen troost. A’j et klook bekiekt en dit as moatstaf nemt, do ik gewoon niks onder vuur al dee sporters. Wördt et toch nog nen mooien dag, wat iej?

Martin ter Denge

Meer berichten
 
Auto zoeker