Foto: Jan Joost

Platte column: mooie weenkelstroatn

Loopt duur ne willekurige weenkelstroate en iej zeet doar enen kroam eenheidsweenkelketens; gin lak of smak an. Allemoal dezelfde pädte, allemoal dezelfde teuntelderieje, allemoal sale in plaatse van oetverkoop, black Friday, allemoal dezelfde heugte van de stellingen. Of het non geet um nen Blokker, nen Ter Stal, de Hema, de Sting, Readshops of Rituals, het is aln deksel hetzelfde.

Het oonderscheaid maakt de femilieweenkels, zo as de Marktwinkel in Riessen, Garrad van de Keuns, Wieger Smeijers, den kezekroam in det paand van Efo, Wilm van de Krone en den greuntekearl biej de Messe. Zukke weenkels maakt de weenkelstroaten leawndig en dut verkopen.

De weenkelstroatn is gin lak of smak an. Aln deksel ‘t zelfde!

Nen stap wieter goat Hanzestea. Échte Hanzestea bedoel ik dan, want Riessen zég det het ne Hanzestad is, mear doar geleuw ik het minne van. Kiekt noar Kaampen, Deawnter, Zupthen en Doesburg. Allemoal stroaten met weenkels mear dan ook biejzeundere weenkelkes. Iej zeet weenkels dee at doezenden ansichtkaarten verkoopt, weenkels dee at nog met LP’s doot of cassettebeandkes, oolderwets of vintage spölgood, tweedehaands bookweenkels met atlassen of mooie etsen van stadsgezichten of een vrettekröamke met Noord Koreaansen petet en gehakbälle.

Kortens wa’w in Zutphen en zagge viej ook nog zon biejzeunder weenkelske. Het weenkelske het ‘geluksvogels’. Niejsgierig a’k zirre, gung ik noar binnen hen. Het bleek nen weenkel te wean vuur de veugel- en natuurleefhebber. Kö’j doar van bestoan? Wee’k nit, mear het was der gezellig drok en de kassa rätteln stöadig verdan.

De kasse röateln stöadig verdan. 

Ze verkoopt doar veerteen soort nestkäsjes, vuur biejmeeskes, muskes, getelings, zwaalven en nog völle mear. Der lea van alle soorten veugelvoor, koekoeksklöks of muziekdeuskes met hele röstgewende bosvogelgeluden vuur op de WC. Doar kö’j good van. Zengt ze. Ik zagge doar vearkiekers, doezend vogelbeuker, zaklantearns, telescoopkiekers, mear ook heulten veugelkes dee a’j zelf köant opkluurn. A’j nen gellen geteling weelt hebben, doo-j det. Der leupen oolders met wichter met pindakeezepötjes, minstens zeuwn soorten. Of inklapboare loepen um net as Wim Ligterink vroger op ‘n boek paddesteule oetvergroten. Mooie plaatn um van te learn met doarop beume en struke, van alle soorten ongemak, plaatn met roofveugele, paddesteule, vlinders en hommels. Mear ook nen ‘birdcall’. Det is een deenk woer a’j met een metalen soort slöttelke in een heulten kökkerke dreeit. Det gef dan een soort veugelgeluud, woerduur at veugel niejsgierig wordt en op oe ofkomt. Ik zagge doar ook ‘bushcraft’ -anstekkers. Doar kö’j dan in de weeldernis een veur met maken, vanzelf ook routekaarten um te waandelen, zakmesse, messe vuur wichter en beuker hoe a’j een voedselbos köant anleggen. Wat nen mooien weenkel, woer a’j nit köant loaten um wat te kopen.

Net as biej Action. Mear dan aanders.

Gerard Voortman

Meer berichten