Platte column: De Persconferentie

Communicatie is ne keuns. Het lik seempel: nen zender gef een signaal an nen ontvanger. Ne boskop geet van A noar B. Ik zin in min leawen heel wat leu teeng ekömmen dee ne boskop wollen metgewen. 

Ach, d’r geet vake wat mis. As ontvanger he’j mangs de gedachen d’r nit biej, of iej dwaalt of, de zeander kan slim jachterig wean of te dom um vuur ’n duwel te daansen of hee hef ’n verkeerden stropdas biej een verkeerd buis of de geachte spreekster hef ineens een vrömd kapsel, enzoverdan. Mangs he’j begenadigde sprekkers. Het is dan een genot um te lusteren, iej mist gin woord. Dan kan het geburen da’j tehope met eslept wordt in nen aanderen modus, het dut oe wat, iej komt thoes en iej zeent d’r nog vol van.

twee rode kolen leenks en rechts op ‘n raand van ’n kaansel

Ik deanke dat iederene wal oet ervaring kan sprekken. Sommige domies en pastoors konden d’r ook wat van. Bekeand was domiej Zelle, hee lea ooit ’n moal biej de middagpreake twee rode kolen leenks en rechts op de raand van ’n kaansel en vuurspealden dat d’r in ’n koarkdienst iets heel biejzeunders zol geburen. De leu keken ne preake laank noar dee kolen en toen de preake oet was, spreuk ds. Zelle: ‘Gemeente, d’r is een wonder gebeurd, ik heb niemand zien slapen.’ Of zo het oeteindelijke doel bereikt wör: wat verkondigden hee non featelijk in dee preake: dat is nog de vroage. 

over twee weken steken we de thermometer erin

Ik kieke aait met verbazing noar dee persconferenties van Mark en Hugo. Nee, nee, viej hebt het hier nit oawer de inhoold van de boskop: of de besloeten versteandig zeent of onwies, het geet hier puur um de manere woeróp de boskop wordt ebrach.
Nen bessen plear ruis! Iej wordt gedurig of-eleaid, iej bekiekt de achtergroond (‘Samen krijgen wij het virus eronder’), de twee keals stoat achter nen lessenaar, en disse zenders steurt onmeunig völle wöare achter mekoar verdan met ne vaart de ruumte in, de gebarentolken köant öar nit biejoolden. Geboeid kiek iej noar dee vrouwleu, dee beweangt tenminste nog. En al kiekend heur iej de boskop nit. De saaiste leazing van rechtevoort wordt nog begeleaid duur passende plaatjes. Gin sprake van, Mark knipt de zinnen in bölkes en gef zovölle noadruk da’j nit lenger heurt wát-e te zeggen hef. Hugo raffelt an enen oadem verdan. Humor is vear te zeuken, ik kan miej gin relativerend gräpke herinneren, wal tenenkrommende beeldspraak: ‘We gaan over twee weken de thermometer erin steken waar we staan’. Nit geestig, nit smakelijk. Klungelig, ik kan ’t nit aans formuleren. Dewiel d’r volgens Pieter Omtzigt 800 vuurlichters in ’n Haag zit.

Vot d’r met…

Gerrit Kraa