Afbeelding
Foto: ©2021 STUDIO 81 Photography

Gerrit Dannenberg

Algemeen

An ’t eande van ’t joar worre viej aaltied ’n betje filosofisch. Koomp duur dee sfeer van de aparte dage. Kraanten geewt joar-oawerzichten. Der stoat liesten in van bekeande leu dee ’t oet de tied kömmen. Deepzinnige verhalen ook oawer wat echt belangriek is in ’t leawen. De wieze les is dan natuurlijk de’w wal vake gaauw klaagnt oawer de dinge dee’w mist en vake verget te kieken wa’w juust wal hébt. Alns is betrekkelijk. 

Meriens Hofstee en Graads Koldeweij steunen ofgelopen moandag op ’n Scheeld. Ze deden ook oawer ‘t joar det zowat vuurbiej wes, oawer corona, de economie, ’t leawen, de oondernemmers in de Quote 500 en wa’j met al det geeld mossen. Volgens Graads was ’t ook allemoal betrekkelijk. Wat he’j an al det geeld? Wal makkelijk a’j der wat van hebt… mear wieter? Nen hoond wil ’t nog neet vretn, iej köant neet mear as zat etten en gezoondheaid is neet te koop. Hee sleut of met ne woarheaid as ne koo: “Geeld maakt neet gelukkig. Deank iej non echt det de man met 10 miljoen gelukkiger is as de man met 9 miljoen? Weant toch wiezer!” 

In de NRC leus ik een groot verhaal oawer schandalig rieke leu op de wearelnd en de vroage wat ze vuur de maatschappij hebt edoan met al den riekdom. Mooie vroage, mear iej scheet der niks met op. Ze hebt der vake hard vuur ewoarkt en zeent gewoon baas van de eagen ceanten. 

Wat miej aaltied wál opvaalt is det leu dee ’t eagenlijk nooit wier hoownt te woarken, toch aaltied gewoon verdan bliewt woarken. Dat hef netuurlijk met zingewing van doon. Ook al he’j nóg zo völle geeld; een heeln dag op de koonte zitten gef gin voldoning. Mangs deank iej: woer hebt ze zik fealijk zo drok vuur emaakt? Mear doar he’j ’t wier: alns is betrekkelijk.

Loa’w het joar ofsloeten met det oale verhaal van den Zuud-Afrikaan den an ’t water zat te visken. Der waandeln nen oondernemmer langs en den vreug um wat’e dee?
“Ik vange een poar viske en dee et ik vanoawnd op.”
Een zakenman adviseerden um een poar viske extra te vangen, dan kon’e verkopen en van det geeld nen extra hengel anschaffen. Dan kon de man nóg mear viske vangen.
“Woerumme zo’k det doon?” vreug een visser.
Noh jea, dan kon’e dee extra vis verkopen en van det geeld personeel in dienst nemmen. At de zaken dan good goat, ko’j op een doer zó völle geeld verdenen, da’j zelf een heeln dag an ’t water konn goan zitten visken.
Zeg den visser: “Wat doo’k non dan?”

Gerrit Dannenberg

Afbeelding
OV-ambassadeurs houden inloopspreekuur in Rijssen 50 minuten geleden
Afbeelding
'Versiering' aan hekken bouwterrein Albert Heijn 15 uur geleden
De koeien houden de wacht bij de poasboake van Holterbroek. De komende dagen wordt daar nog hard gewerkt om er een mooie poasboake van te maken.
Speciale paasvurenroute langs Holtense poasboakes 16 uur geleden
Met de hulp van een leerlinge hijst wethouder René de Koff de vlag als startsein voor het verkeersexamen van VVN Rijssen-Holten.
'Zijn jullie al een beetje zenuwachtig?' 21 uur geleden
Afbeelding
IVN houdt fotowedstrijd rondom het thema Lente 23 uur geleden
Afbeelding
Nú is het moment om te winkelen bij Van Dal mannenmode in Rijssen 27 mrt, 20:19
Bart bezoekt regelmatig zijn ouderlijk huis en vrienden in Holten (eigen foto).
Bart Vermeulen reizende ster in artiestenland 27 mrt, 18:12
Vlnr: Dick Keizer, Henk Plas, Gerrit Koster, Herman van den Belt, Wim Janssen.
Noordermannenkoor zet jubilarissen in het zonnetje 27 mrt, 12:07