Platn column: Wikipedia
AlgemeenMei 2006 zat ik as obstinoaten student wat rond te kieken op Wikipedia. Natuurlik oaver Twente, want iej komt pas wier a’j vort hebt ewest. Links onderin zaggen ik ne lange lieste met interwiki’s: koppelingen noar etzelfde artikel in ne andere sproake.
Bie Twente stund der ne koppeling noar ‘Nedersaksisch’. Ik krabben mie es achter de oren. Dat klunk vaag bekend, mer net as ’n duursnee platsprekker wus ik ook helemoal niks van de sproake. Behalve dan dat et oerdom, slecht en lellik was. Dat was mie töt in den treure verteld duur deezelfde leu dee klaagt dat de jongeleu et neet mear wilt kuieren en wat jammer toch hè.
Toch klikken ik. Ha’k et mer neet edoan. Want doar stund een heel artikel oaver miene strekke, in de sproake woeras leu al tientallen joaren zukke heupe met onzin oaver rondkwaket. En dat mer blievt doon. Ik vund et prachtig. Mer een artikel oaver Riessen was der nog neet. Dat mos veranderen. Ik maken mie nen konto an en doar rätteln et hen.
“Riessen (Nederlands: Rijssen) is ne stad in de gemeente Riessen-Hoolten… Der wont ongevear 28.000 inwonners op ne vlakte van 28 kilometer in et veerkaant,” dee ik.
En zo begun et. ’n Tweeden gung oaver klootsketen, want tja, iej begint bie de klisjees ja. Mer noa et artikel oaver de Middeleeuwen dachen ik bie miezelf: “Wat nen onzin eagenlik. Iej köant ook gewoon oaver andere dinge in et plat skrieven dee’t de jongeleu WAL interessant vindt.” Dus maken ik een artikel oaver et onderwoarp ‘Farao’. Zo lear’j nog es wat! Want iej mut der oe eerst zelf in verdepen vuurda’j wat klooks op papier köant zetten. En toen gung et pas echt loos.
Mangs dee’k moanden neet, mangs inenen vief artikeln in de wekke. Woerumme toch? Ik mos loaten zeen da’j met Plat ook oaver allens wal köant kuiern en skrieven. En da’w doar zelf achteran könt. Nee, mut.
Op de Nedersaksische Wikipedia (7588 artikeln) stoat noe zowat doezend platte artikels van mie. Oaver allens wat mie in et zinne sköt. Van de Kroaje töt Kizomba en Kongo-Brazzaville. Van Neurofunk töt Sterrin Smalbrugge en Gretha Thunberg. En ik wil nog alle landen van Afrika beskrieven. Mien artikel oaver Kenia kö’j neet umhen. Mer ook oaver de Homo erectus. Want den kump doar ook vort. Net as wiej.
Vuur et 997e artikel was ik gangs met de presidentsverkiezingen van São Tomé en Príncipe. Eaven gungen mie de moodvearen hangen: ‘Wee geet dat noe leazen?’ Mer toen bedacht ik mie tegelieke: ‘Wee geet dat noe in et Hollands leazen?’ Dus toen kon ik der wier tegen.
Martin ter Denge