Platte column: jöarig
AlgemeenVölle verjoardeage zeent slim vuurspelboar. Met verhalen dee’j met de ogen en de oren dichte an zeet kommen. Vake de vrouwleu ampat, kuieren oawer Boer zoekt vrouw, oawer Heel Holland bakt, oawer Twee voor twaalf, oawer een niej recept.
En de keals um de toafel hèn: wee begeent ’t eerste met nen bak of ne anekdote. Weainig verschil tusken vroger en rechtevoort: ’n één veendt dit, ’n aanderen dát. Vroger was Wilm nen ferventen vuurstaander van nen Solex, Mans was gek met zo’n doonkerblaauw poas-eai vuur op de fietse, nen Berini, zo gezegd. Karel jakkerden op nen opgevoerden Kaptein Mobilette. Een poar joar later har Wilm een R-viertje en har Mans nen Volkswagen Kever. En Karel har toen nen board en höare tot op de skoolders, hee wol allenig jagen in ne Lellijke Eane. Rechtevoort hef Wilm nen motor: nen BMW, Mans nen Suzuki en Karel nen Yamaha, en doar raakt ze alverdan nit oawer oet ekuijerd.
De vrouwleu vernemt woer de keals ’t oawer hebt en geewt commentaar net of ze ‘t oawer wichter hebt. Gerdien (van Wilm, dus) veendt het mer niks. Wilm is al ’n moal met motor inclusief Gerdien en al umme-völlen biej een stoplech, hee wol zin leenkerbeen op nen stoepraand zetten mer stapten der ietskes nöast. Gelukkig harn weanig aandere verkeersdeelnemmers behoofte um oawer um hèn te jagen, leu genog um het spil wier rechtop te krieng.
Oonderdoems komt dan de schaaltjes met chips en pinda’s en wat nit al vuurbiej. En dat plateau met wos, keze, gehaktbälkes, gevulde eaier, of eaier met ’n pläkn rookworst der ummehen, en het is nit onmeugelijk dat het doarnoa geet oawer wat ’t spil kost, de leste tied. En ze veendt eenparig dat alns slim deurder wordt. Dat gas! Dee benzine! ‘t Elektrisch, is dat wat? Doar he’j wier verschil van meaning.
En zo krop ’n oawnd vuurbiej.
Op ’n lesten steet Gerdien nöast ’n stool van Wilm. Allo, ’t is berregoanstied! Doar he’j wier de onvermijdelijke sprekwöare: iej köant ’t nog wal wochen as ne henne op de delle… biej oons hebt ze het nit oawer ne henne op de delle mer oawer ne henne vuur ’t gaas… moarn is ’t wier vroo dag… doot heanig an… bedaankt vuur alns… komt ’t biej oons wier ophalen..
Wilm blif dan nog geane efkes plakken. Gerdien mut um herhaaldelijk manen. Goa’j nog met of bliew iej doar stoan?
Op ’t huuske kik Wilm nog efkes op ’n jöardagskalender wee now ’t eerste an de buurte is.
A’w het beleawn mangt, tenminste…
En a’j ’t beleawen wílt…
Gerrit Kraa