Platte column: Kolumnkampioen

27.09. Et zol nen doatum können wean, mer nee, et is de tied woerin as ik vief kilometer kan hechebalgen duur ‘n bos. A’k een betten mien beste do. Verleden vriedag mos et em wean: de Riesserboargloop.

Et zol mutten lukken, want ’n oavend in et vuurten had ik vuur et eerste 5km an een stukke lop. De linkere kute spleet mie hoaste middenduur van dat poar moal repeteren vuurof, mer ik had mie bie et ophalen van et startnommer earder disse wekke van dee kniephoajen anehaald. Et meaken protesteren: ‘Vuur dat ene moal lopen!’ Mer ja, an de gear zal et neet liggen. Een betten zo a’j rond de Ronde van Frankriek wier kearls op middelboaren leaftied met nen dikken balg in een völs te strak päkken op ne te kleine fietse zeet beunen. Aerodynamisch as ne bakkeie.

Vuurof wus ik ook geheels neet wo gauw as ik kon, want ik had et bewust neet bie ehölden. Dan valt ja allens met. En ik mos es learen neet direkt voloet te goan. Lusteren noar et w- öah lief!

An de start was et mooi drok. Moat Voortjans had zik vuurenömmen zienen besten tied te verbrekken. Hee mos mer doon. In de achterhoede spreuk ik Heidi en Wouter. Old-vakbreurs van bie de goardenkearls. Zee warren net zo good vuurbereid as ik. Et startskot heuren ik al geheels neet, mer de massa begun te hobbelen en ik deed mooi met.

Ik höaken an bie een stel euldere dames, dan he’j wat te kwaken. Inmiddels kömmen ons de eersten alwier in de meute van ’n bult of, dee hadden et dreeipunt op den hogen Riesserboarg al ehad. Ik had nog puf um te geinen of de muziek van dat dweilorkest doar zo slecht was. Mer a’j zo wied vuuroet loopt zi’j der froai serieus met. Et was mer eaven of de atletiekbane köm alwier in zicht. Ooooh, noh! Wiej zint der al hoaste! Met de handen in de locht zatten ik an vuur de finish. Töt mienen skrik leup iederene gewoon voordan! Wiej warren nog mer op de helfte! Mer noe ha’k der ’n gank mooi in. Heanig keek ik vuuroet of ik dat felgreune shirt van Voortjans nog kon zeen. Bie de tweede beklimming köm hee mie met een klaphändken in de meute. Op ’n bult dansen ik nog eaven met met Griekse Wijn. Prioriteiten jongs. Een heanig buujken zörgen vuur verkeuling.

Noa wat bocht- en heuvelwoark kömme wiej vuur de tweede keer de bane wier op. Et helpet toch as leu oe anmeudigt. As ze dat noe es bie disse stukkes deden… ‘n Finish köm in zicht. Met 27,09 kilometer an et uur plearen ik der oaverhen. Et duzeln mie vuur de ogene. Gauw an ‘n beer, dan wee’j woer’j et vuur doot. As et nen wedstried dom nöalen had ewest was ik vaste kampioen ewörden.

Martin ter Denge 

Meer berichten
 
Auto zoeker