Platte column: Financieel Dagbladverhaal

Jonge, jonge, jonge, wat nen lofzang op dat oale Riessen… Het financieel Dagblad tikten kortens nit meender as veer bladzieden vol met niks dan positieve berichen oawer Riessen. Met as kop: “Bijbelvast Rijssen werd schatrijk door jutezakken, transport, bouw en matscultuur”. Het verhaal wordt oonderbouwd met hatte ciefers. De Riessense haringparty (op zin plat: het hearing-vrettemöalke) brach €164.500 op vuur ’n good doel, dat was roem veertigdoezend euro méar as Eanske, Hengel en Almelo tehope opleaverden. In de Quote-500 stoat negen rieke leu oet Riessen-Hoalten en in 2021 tealden het Financieel Dagblad vief FD-Gazellen. Iej kriengt een Gazelle-award a’j valt oonder de snelst gröaiende bedrieven in Hollaand. In het artikel wordt twee gazellekeals eneumd: Jelle Smeijers en Robbin Breukink, (beaide oet de IT-sector).

’n Journalist leaverden gen half woark. Hee kuijerden met o.a. Bert Tijhof, ’n wethoolder, met Jan Bakker as vuurzitter van ’t Riessens Museumbestuur en oald-vuurzitter van de Kring Werkgevers Rijssen, en leaverancier van een gezegde dat kenmerkend is vuur de Riessense oondernemmers: “Mats iej miej? Mats ik oe!”

Het FD gaf ook andach an de Riessense orthodoxie, an Riessen as oostelijken oetleuper van de Bible-Belt. 

In dit artikel gin smalende scheempschötte, mear ne integere poging um noa te goan wat de rolle is van de orthodoxie in de Riessense economie. Volgens het FD is de godsdienst gin oeterlijk vertoon, iets wat d’r zo betjen biej haank, mear is de godsdienst geïntegreerd in de haandel en waandel van de Riessender. Een betje ne merkwaardige alinea is dissen: “Niet alle inwoners van het stadje, dat omgeven was door veengebieden en daardoor geïsoleerd lag, zijn gelovig, en er is ook een grote katholieke gemeenschap”. A’j dat verkeerd wilt leazen, valt de katholieken dus boeten het geleuwe. Mer zo zal het nit bedoeld wean… 

Good dat het artikel ook andach gef an het oonderwies. Met name de samenwerking van gemeente, de woarkgevers en het oonderwies, ebeundeld in “Kampus”, een instituut van vakopleidingen, bevolkt duur 600 studeanten, en vake bezoch duur bussenvol bestuurders, dee geane wilt zeen woedöanig Riessen dat vuur mekoar hef ekregen. 

Een mooi artikel, een good verhaal. In een poar bladzieden kö’j lange nit alns an de orde stellen. Ik har geane ook nen domiej an etröffen, um commentaar te gewen op de combinatie orthodoxie/economie/succes. En: woer zeent de oondernemmende vrouwleu in dit verhaal? Ook Lucky, de sport, de culturele verenigingen, bliekboar wordt het tied vuur een oetgebreaid nommer. En dan nog wal geane één deenk wat hier compleet ontbrek: het plat as smearmiddel biej dee contacten, met name ‘n economischen sector sprek nog volop plat. 

Mats iej miej- mats ik oe. Weajnig wöare - mer wal in ‘t plat…

Gerrit Kraa