Platte column over Beume (3)

Zeukt vuur de wille es op Google Maps noar ‘Inverness Terrace, London’ en loatt doar dat pupken van Streetview es vallen. Doot mer es. Zi’j der? Ja? Mooi hè? Dee stoatige gebouwen met dee witte poerkes en käpkes op de roetenliesten, echt Georgiaansen bouwstiel. Deftig. Iej zollen hoaste zeggen: doar kan Riessen met dee nikszeggende, nearslachtige blukke nog wat van learen. Mer da’s neet wat et meeste opvalt.

Al dee gebouwen kö’j hoaste neet zeen. Der stoat ja van dee machtige beume vuur. Wat hebt der nen stam van wal dikke twee meter duursnee. Kan ik weten, want ik hebbe doar vanwekke zelf bie stoan kieken toen a’w doar in een hotel zatten. Dat zint olden, dee knapen, dat zee’j direks. Doar hebt ze tenminsten wal de tied ekregen um groot te worden. En dat midden in Londen!

Och ja, ze drukket de stroate wat in de heugte of hier en doar een muurken oet et fatsoen, mer alleman kan der zik good umme redden. Da’s authentiek. Dat gef karakter. Dat breg leaven. Zo as de Grönningers zo mooi zegt: schaif stait laif (skeef steet leef)! Umwonnenden en bezeukers? Och, dee weett neet anders. Ze parkeert der dan toch ook zo mooi umhen. En as ze ginne stea vinden könt, kiekt ze een ströatjen wieder. Nit nöalen. Zo doot ze dat in Londen.

Londen hef zowat 8,7 miljoen inwonners, zeg Wikipedia (ik hebbe ze neet eteld). Wat oppervlakte angeet is stad Londen grötter as de strekke Twente. En der komt alle joaren ongevear 14 miljoen toeristen op of. Iej zollen dus meanen dat ze ieder steaken wal zollen willen benutten. Mer in Londen hebt ze et begreppen: zonder dee machtige moppen langs de liene zol et der een heel stukke minder oetzeen.

Riessen hef nog gin 30.000 inwonners. En volgens de Twente Toerisme Monitor kree’w in 2009 zo’n 2700 toeristen. Vuural Holten, ducht mie, want vuur de mooie gebouwen hoo’j in Riessen ook neet mear te wean. Mer ás ze kömmen, warren et in duursnee zo’n 8 man op nen dag.

In Riessen munn zo’n betten de leste echt mooie beume dee’w hebt, dale. De leu wat der umhen wont hebt der gin last van. Dee 8 leu wat der hier in Riessen achterhen komt kieken, könt ‘n auto makkelik in ’n Torrokelder, an ’n Hogen Pad, ’n Hoarende en ’n Kraans kwiet.

Mer nee, dee beume munn an de vlakte. Mer wiej mut wal de klimaatdoelen halen, tegelwippen en nieje beume potten. Ik zal mer niks zeggen oaver rentmeisterskop en dee valse christendeurns. Leu met inzicht misse wiej. Logisch, dee zitt in Londen.

Martin ter Denge