Afbeelding

Platte column: Det oale Riessen

Algemeen

Geluksalnjoar, op alle maneren is oons alle goods toe eweunsket vuur 2022. Van hetzelfde, dus! Het is aait de möaite weard um ees te kieken noar de kraanten van vuur 100 joar, en dan too esptist op Riessen., anno 1922. Dat kost nit völle möaite, met daank an vriejwilligers van het Riessens Museum. Zee hebt dee Riessens Weekblad op internet ezat: zeukt ees via Google -Rijssens weekblad-1922 en dan he’j 20 nommers! Ik nemme het exemplaar van 12 augustus as vuurbeeld. Dan regelt de Gemeente de distributie van gaspenningen. Ter info vuur de jeugd: dat warn kopperen meunten met een häpke oet de raand, zo pasten ze precies in de gasmeters. Dee höngen duurgoans an de binnenkaante van de delle. Dichte biej de baanderdure. Ideaal vuur de jeugd um ‘t gaskreantje dichte te drejen, dan wör het froai duuster in de wonkamer en kleunk d’r nen onmeunigen schreeuw vanoet de kökken, en zochen de stroatjongs een good henkommen via de smalle weegten tusken de huze. Nen gaspenning kostte 18 ceant per kubieke meter, iej konden d’r tiene tegelieke in ‘n meter doon, en ze warn te koopn biej het gemeentelijk kantoor en biej de volgende weenkels: Ter Horst-Bouwstraat, Klein Horstman- Elsenerstraat, Ibrink-idem, Dommerholt-Elta, Dijkink-Haar, Wed. ter Weel-idem, Huizink-idem, Ten Bolscher-Eschstraat, Ten Hove-Höfte, Wed. Siemerink-idem, D. ter Harmsel-Haarstraat, Bosch-Enterweg, Klein Ligtenberg-Oranjestraat, Kraa-Walstraat, Eshuis-Wierdenschestraat, en wed. A ter Harmsel-idem. Euldere leu zengt now: “o, jà,’ en ze könat de biejnaams d’r zo biej neumen.

In het Parkgebouw har de deftige Vereeniging ter beoefening van Overijsselsch Regt en Geschiedenis vergaderd, (Ter Kuile gaf d’r een boeiend referaat oaver Riessen en omstreken), en doar was emosterd oawer niejerwetse stroatnaams, het advies was um dat wier oolderwets te maken. B & W. warn d’r vuur, en ’n Road ook, op ene stemme noa. Een deel van De Wierdensche stroate wör now wier Smitteneind, een ander bölke Smittenbelt, de Stationsdwarsstroate neumden ze in ‘t vervolg wier Zwarte Weg, Parkstraat wör Hangerad, Spoerstroate wör wier Boomkamp, Rozengaarde wör wier De Steeg.

Dan warn er nog proefvealden an de Eanterstroate woer niks aans as keunsmest wör toe epast: chili, super en patent kali, en doar gebroekten ze pot-earpel as Eigenheimers, Roode Star en Deventer geelen. Kieken wat het beste resultoat opleaverden. Vake steun d’r adverteanties in van ne Verkoping, met as netoaris Schönfeld Wichers, ditmoal biej ‘de Roohaân’ destieds nen hoarboarg biej de oale ofslag noar de Goorse weg tusken Riessen en Eanter.

En Te Lintelo verkoffen corsetten (kesjètn) voor àlle leeftieden, ook vuur kleane wichter. De illustratie van 29 juli 1922 steet hieroonder. 

Gerrit Kraa

Afbeelding
Afbeelding
Nieuwe tafel? Maak hem samen met Mooie Tafels 1 uur geleden
Afbeelding
OV-ambassadeurs houden inloopspreekuur in Rijssen 3 uur geleden
Afbeelding
'Versiering' aan hekken bouwterrein Albert Heijn 17 uur geleden
De koeien houden de wacht bij de poasboake van Holterbroek. De komende dagen wordt daar nog hard gewerkt om er een mooie poasboake van te maken.
Speciale paasvurenroute langs Holtense poasboakes 19 uur geleden
Met de hulp van een leerlinge hijst wethouder René de Koff de vlag als startsein voor het verkeersexamen van VVN Rijssen-Holten.
'Zijn jullie al een beetje zenuwachtig?' 23 uur geleden
Afbeelding
IVN houdt fotowedstrijd rondom het thema Lente 28 mrt, 12:06
Afbeelding
Nú is het moment om te winkelen bij Van Dal mannenmode in Rijssen 27 mrt, 20:19
Bart bezoekt regelmatig zijn ouderlijk huis en vrienden in Holten (eigen foto).
Bart Vermeulen reizende ster in artiestenland 27 mrt, 18:12