platte column: sponsors

Oonze hele maatschappij dreejt um geeld verdenen. Zo völle meugelijk en zo gaauw meugelijk. Gelukkig zeent ‘r nog altied leu dee zik oarns drok vuur maakt zoonder doarvuur betaald te worden. In musea en zorginstellingn zeent nen hoop vriejwilligers gangs. Ze zet zik belangeloos in. Oet nöastenleefde of gewoon umdat ze veendt det ‘t zo heurt. 

Ook de sportclubs köant neet dreejn zoonder vriejwilligers. Natuurlijk he’j aaltied vette sponsoren neurig. A’j alle bedragen biej mekoar optelt dee de oondernemmers in de sport stekt, kom iej an een fleenk kapitaal.

Priezensweard, want ze zeent het natuurlijk neet verplicht. Een heel good deenk da’j as grootverdener ook groot geeld stekt in oew club. De clubs zelf zorgt op eur buurte wier heel good vuur de geeldscheters. Business seats in de stadions um zo angenaam meugelijk foebal te kieken, luxe skyboxen vuur de zakenrelaties. De beste parkeerplaatsen. Natuurlijk krig de club doar ook wier geeld vuur. Dus wordt de sponsoren met ontzag behaandeld.

Mer non eawn heel skoarp der langs: a’j barst van ’t geeld, hoe meuilijk is ’t dan um indrukwekkende bedragen te geven an oew favoriete club en doar ook nog extra dinge vuur terugge te kriegen? Dan mu’k toch eawen wier kieken noar de vriejwilligers. Dét volk stek eur grötste kapitaal in de clubs en organisaties: leawnstied! Onbetaalboar, want het koomp nooit wierumme…

Alle vriejwilligers in oonze maatschappij geeft miej een woarm geveul. Ook leu dee met ne collectebusse an de dure komt. Want vergist oe neet, der zeent aaltied leu dee noarns an metdoot. Ze weelt heugstens geeld geewn at der wat tegen-oaver steet. 

In een klean pleatske wieterop in Tweante gongn een zetje terugge de jeugdleden van ’n foebal vriejwillig roond um lotten te verkopen. Hoofdpries: ne plasma-tellevisie van 2000 euro. De lotten kosten 2 euro stuk. De möage kömmen ook an de dure biej Dieks Ogelink: vriejgezel, vreandelijk, mear froai op ‘n penning. Of Dieks lotten van 2 euro wol kopen vuur ’t goo doel? 

Dieks vreug dreks: “Wat kan’k winnen?”
- De möage zeaden: Ne plasma-tellevisie van 2000 euro.
Noh, Dieks wol wal één lot kopen.
Toen vreug’e: “Mer a’k een lot kope, wee’k dan ook zeker de’k dee tellevisie winne?
- Nee, netuurlijk neet, zeadn de möage, het is toch ne lotterieje?
Toen zeg Dieks: “Dan doo’k het toch mear neet, want dat wordt ’t miej toch te deur!”

Gerrit Dannenberg