Gemberduuts
Met de hoarfstvakaansie vurig joar warre viej in Duutslaand. Gezellig in 'n huuske met vloerverwoarming en nen vaatwasser op 'n park woer van alns vuur de wichter te doon is zo-da'j doar ook 'n heeln dag nit achteran hoown. En ik magge dan geane heel heanig boskopn doon, oetzeuken wa'w eens zöat etten den oawend en zo heel heanig anköakeln. Dus ik op nen moarn de vrouwe met de wichter edropt biej de ochtendbeat en 'knutseln met Boris Beer' en noar 'n weenkel hen.
Toen ik doar köm dreumden ik heanig langs de schappen hen en keus 'n mooi pastagerecht met alle ingrediënten vuur nen mooien saus d'r biej: teentje knoflook, poar tomaten, iej kent det wal. Mear toen leup ik langs 'n schap met pompoenen. Ik dachen: kiek doar eens, det kan ik ook wal 's preberen. Heel gezoond is det, zonnen pompoen, typisch hoarfstig etten en ik har alle tied van de wearld um 's röstig zon recept terechte te maken. Lea d'r toch krek een recept biej. Alle ingrediënten op 'n liesje en ook nog precies hoe-j det kloar mossen maken. Ikke 't spul vuur de pasta en de tomatensaus terugge-leggen en wier op de pompoenen an. Mer jea, zo'n liesje is netuulk in 't Duuts en ik kenne best wal wat, mear zengt 't mear earlijke wat Ingwer, Kürbis, Leek, Kreuzkümmel en Brühe is. Det weet iej ook dreks nit. Mer gin nood, ik gung op nen vreendelijken Duutser of um 't te vroagen.
't Was nen oalen kearl den 'n betje meuilijk leup. En toen ik um vreug en 't liesje ofgung har ik feailijk al spiet, want hee begun dreks hen en wier te stroompeln um al dee onbekeande dinge vuur miej te pakken. Ik hobbelden d'r nog wal achteran um te zeggen det ik 't zölf wal wol pakken en det hee nit zo völle meuite hoofden te doon want as hee ;'t mear gewoon anwees zol ik 't zölf wal pakken. Mer hee gung stöarig verdan en lachen vreandelijk. Hee mut wal edach hebben: jonge, ar iej geane Kürbissuppe weelt etten mag iej wal earder opstoan. Noa 'n zetje har ik wat neudig was en ik bedaanken um in mien beste Duuts. 'Schönen Tag noch,' zea hee.
Ikke vearder 't liesje met 't recept ofwoarken en good kieken wat d'r allemoal nog mear mos gebuurn vuur ne lekkere komme pompoensoep. Helemoals an 't eande van 't liesje steun det a'j alns terechte hadden 't hele spul mossen pureren met nen staafmixer. Getderre, dachen ik, in 't vekaansiehuuske hebbe viej det nit. Kon'k alns wier terugge-leggen. Mear den kearl steun nog heel heanig zinne greunte of te wegen. Ik heb eerst mer 'n alternatief rondje duur 'n weenkel emaakt en heb toen oaweral de stickers of-edoan en 't terugge-leg. 't Worden toch pasta met saus. Zoere saus.