Gerard Voortman
Zoomp
De meeste leu dee at in Barcelona wont, hebt vermoedelijk nog nooit dee prachtige katheraal van Sint Eulalia ezeen. Leu dee at in Sidney wont kent het schelpachtige operagegebouw allenig van plaatjes en oet de kraante. Deank iej det alleman oet Ieper al eens ne moal vriejdaangsoawends oonder dee mooie Menenpoorte een Eersten Wereld Oorlog hef herdacht? Um dichter biej thoes te kommen, zeent der leu in Tweante dee at nog nooit op 't Twickel zeent ewes. En deank iej det elken Eantersen al eens met euren zoomp met hef evoaren. Ik deanke van nit, mear det kan ook ne aandere oorzaak hebben as gin interesse in historisch oarfgood.
Net zo as anno 2017 was het good tweehonderd joar geleden met de infrastructuur in 't oosten van 't laand slecht esteeld. Der was nog ginne A1 of een fesoenlijk spoer, mer der was wál ne Regge. Het noadeel van de Regge was det'e froai ondepe was en der warn zelfs steas met een poar centimeter water. Ondernemmende Eantersen bedachen nen platboadembote den at ze 'n zoomp neumen. Vermoedelijk umdet het zoompig um Eanter was, maken ze der nen zoomp van. Deankt nit te min oawer het nut van den zoomp want den brach de Beanthemer steender oet Bentheim oawer 't water noar het Paleis op 'n Dam in Amsterdam. Löag wierumme zol dom wean, zodet het verkloarboar is det Eantersen vuural haandelsvolk zeent eworden, gin febrieksleu en feaitlijk zeent het nóg een betjen van dee vrijbuiters.
Een poar Eantersen met oge vuur historisch oarfgood bedachen zik een poar joar geleden um wier eens zonnen zoomp te maken en den op 'n Breenk too te zetten, van 'kiek eens, doar vaarn'e viej vroger met'. Zonne replicazoomp kosten honderddoezend euro en ze hadden al fleenk espoard en kömmen nog zowat zuuwnenniegntig doezend euro tekort. Det köm dus nit good. Ze gongen met de pette roond en kömmen vanzelf in Riessen oet biej Dik Wessels. Den wol wal garant stoan oonder twee vuurwaarden. Ene: de boot mut können voarn en twee: dee boot koomp in Riessen te liggen. Doar hadden dee Eantersen nit van terugge, zodet een eersten Eantersen zoomp in Riessen köm te liggen. Later maakn ze nommer twee en den lig op dee prachtige scheepswerf in Eanter. Een heel mooi detail is det doar binnen dan ne grote pentekening haank van de Riessense Pelmölle.
Ach, viej zeent as Riessenders de beroerdsen nit. A'j nen Eantersen köant helpen dan loate viej det, as goo noabers, nit.
???????Gerard Voortman