Gerrit Dannenberg
Ofval
Recycling en hergebroek van ofval is de grote mode. Ik veende het ook heel good da'j al oew ofval nit zo mear op nen groten hoop gooit. Heel völle dinge dee 'n enen votgooit, kan 'n aander prima gebroeken. In Riessen hef de gemeente het skeaiden van ofval nuks an-epakt. Op de gemeentewerf wee'j oawerdag nit wa'j zeet. Wal een stuk of tien grote containers vuur allemoal verskillende soorten ofval: glas, hoolt, pepier, iezer en restofval. En ze zeent 'r slim secuur an, want ook al zól iej dinge per se willen störten umde'j nit weelt det 'n aander doar met 'n neuze oawerhen geet, dan nóg ma'j det nit zo mear doon. He'j al oew leefdesbrewe van vroger in plastic hoesjes bewoard en iej weelt dee störten umde'j oonderdoems ne tweede relatie hebt, dan nóg mag det nit zo mear. Alle brewe mu'j stuk vuur stuk oet 't plastic halen. De papiern brewe biej de oolde kraanten en de plastic hoezen biej 't plestíék. En alle aandere dinge dee'j mer eawen vanniejs köant gebroeken munn noar 'n Roondgaankweenkel hen. Doar keump aaltied heel völle volk det van alns kan passen.
As gewone particulier mu'w der al joaren an geleuwen: nen griezen container, nen greunen en non ook nog ene met een oranje deksel vuur 't plastic, metaal en de melkpäkke. Dee päkke begriep ik nooit zo good; hoe verdreg plastic en papiern melkpäkke mekoar toch? Smangs he'k heel slechte gedachen: vroger leuten z'oe een asbest apart verpakken en later gooiden ze alns op nen groten hoop. Mer miskien warren det wal cowboyverhalen. Ik weet nit.
Ofval skeaiden mut biej de bron. Helemoals met eens. Mer is de bron papier, blik, plastic en greunigheaid in aparte bäkke doon? Of krie'w op 'n doer zelfs dree wc's? Ene vuur het restproduct van töafelkes-oawend, ene vuur vegetarische moaltieden en ene vuur moaltieden oet 'n päkn? Viej wocht of…
Mer ook met al te fanatieke ofvalskeaiding kö'j nen hoop stil verdreet veroorzaken. Nen goo kunnigen van oons is der joaren terugge met van het theedreenken of-ekömmen. Het was um te völle gedoo: het zäkn in 'n greunen container, het label biej 't oold papier en 't nietje biej 't oold iezer…
Gerrit Dannenberg