Marieke Dannenberg
Plaatjes
Vurige wekke leus ik op de NOS-app een niejsberich oawer jongern in IJsland. Jongern zeent in IJsland völle gezoonder as in Europa. Jonge leu gebroekt doar meender alcohol, tabak en cannabis. Det hef te maakn met de maatskappelijke anpak van IJsland.
In IJsland mu'j 20 joar wean um segretten te können kopen. Der mag gin reclame emaakt worden vuur tabak en alcohol. Draank en segretten ligtn oet 't zicht en zeent allene te koop in zogenaamde staatsweenkels.
In Europa doo'w ook al een betje met met dissen trend met. Wat miej betreft mangt dee vieze plaatjes van alles wa'j könt kriegen van het roken wal oet 't zicht bliewen. Ik zir nit 'n ennigsen den d'r zo oawer dech.
Vurige wekke steun ik in de riegel biej een poompstation met twee Magnums. Vuur miej höng nen kearl oawer de teunebaanke hen met 'n oarm in 't gips. Ik vroage miej trouwns of of hee met den oarm zölf met jaggen. Met ne duurgereukte stemme vreug'e um twee päks Caballero Regular. De vrouwe achter de kassa dreejden zich umme um ze oet het skap te kriegen. 'He'j gin aandern?' vreug den kearl. 'Disse plaatjes veen ik zo smearig.' Dee vrouwe dreejden zich wier umme en zea: 'Ik heb der nog wal ene in ne doodskiste, een rottend gebit en een keelkaanker. Watvonnen wo'j hebben?' Den kearl hoosten verontrustend en zea achter 'n oadm: 'Doot miej dan mer det gebit, dan plak ik hem wal of. Det kö'j de kleanwichter toch nit loaten zeen?'
't Dee miej deanken an kwartetten. 'Mag ik van oe van de gevolgen van 't roken: de rottende tene?' In IJsland zeent ze in elk geval better gangs. Doar doot ze 't met ne ne combinatie van wetgewing, maatskappelijk bewustzijn, het aanbeden van alternatieven en de oolders wordt 'r biej betrökken.
Mien va en moo hebt met miej ooit nen deal slötten de'k mien riejbewies zol kriegen a'k nit zol roken. Ik heb nit erookt, mer volgens miej ha'k det ook nit edoan zoonder dat riejbewies in 't vuuroetzicht, um de seemple readen de'k nit völle met roken in anraking zir ekömmen. Ik deanke det oawerheidsbemeujenis nit in alle gevallen de beste oplössing is. Mer a't oawer de gezoondheaid van de jongeleu geet, mag d'r wat miej betreft ne IJslandse anpak kommen, want wat leu zeet de gevolgen van 't roken zelfs nit ook al steet in klurenfoto's op de segrettenpäks.
Marieke Dannenberg