Gerrit Kraa
Kammenet
Wat doert dat lange, d'r keump gin eane an dat Haagse genöal. We vorderen centimeters… het lijkt erop dat we eruit komen… er is hoop…. De laatste eindjes aan elkaar knopen…
Het wordt tied vuur nen staatsgreep. Of mut dat stoatsgreppe wean? Gewoon de Tweede Kamer bestormen en ne nieje regering vestigen met de nieje partieje: de PPP oftewal de Plat Proat Partieje. De voertaal is Nedersdaksisch, de randstedelingen kriegt ne verplichte inburgeringscursus. Dat betekent heel völle. Alle ministers dee gin plat köant; der oet! Want allenig de platproaters kuijert zoonder ruis, dan wee-j dreks woer a-j an too zeent. En dan dreks ook Jan Kristen as Eurocommissaris en in Brussel duurdrukken dat oonze dialecten erkend wordt as UBP, Uitsluitend Beschaafd Plat. Hee begeent in Brussel zinne inaugurele rede met de zin: "Geachte koekeldorissen, brekt miej 'n bek neet lös." De euro wordt dreks of-eskaft, dat gef inflatie en deure priezen, de leu kriegt allenig consumptiebonnen met het opskrift: Dee 'n stuwer neet eart is nen daalder nich weard. Ook de allochtonen mut inburgern met plat, dee leare viej plat proaten met zinnen as: roepen in 'n moos, zwil in de oren, miegeapen op 'n zul, he-j al edretten in de gruppe en zo; doar mossen vroger ook de importleu hier met ontgroend worden en dee zeent d'r ook neet slechter van ewörren.
En de troonrede ook in het plat. 'n Koning krig nen cursus Twents. Hee begeent de rede met: "Moi leu, mu-j 's lustern, het kommende joar gin genöal, d'r an met de lippe, maakt de böste mear nat, howt het gat met vuuste." en dan zo verdan.
Op de skole proat de measters en juffrouws ook plat, met pedagogische opmerkingen, zo as: "Wat zi-j toch een leef wich; allo mien kearlke, dat kö-j bes!"
Drank maakt meer kapot dan je lief is veraandere viej in de leus: één witten moes maakt nog gin delirium.
Biej FC Twente he-w al Goat stoan a-j vuur Twente bint. Biej de zekenhuze krieg iej: helpen doo-w dreks, een woonder doert iets lenger. In de etalages: kieken kost niks, a-j 't metnemt mu-j betalen. Einde winkeldiefstallen. Gin parkeerbootes; mer een breefke achter 'n roetenwisser: dit is de leste keer, doerak, woangt het neet wier.
Het Wilhelmus wordt vervöngen duur Daar ligt tussen Dinkel en Regge een land. En de Nederlandse leeuw duur het Twentse Ros. En zo leawt de leu nog lange en gelukkig oonder het eerste kammenet Groothengel. As de Tweede Kamer begeent te vergaderen zeg 'n vuurzitter "Doar wa-j, leu?" En as ze oet mekoar goat: "Viej goat wier op 't hoes op an.
Goodgoan, doot heanig an"!