Gerard Voortman
Nieje team
Eens in 't halve joar bedeankt ze biej oons op de zaak wier det ze het toch wier aanders anpakt en kö'j oew wier opmaken vuur nöadere kennismaking met oew nieje team. Eens in 't halve joar is netuurlijk stoark oawerdrewen, mear het veult mangs wal zo. Good vuur de teamgeest, volgens de gelearden. Mear iej mun netuurlijk eerst weten wee at Merietje, Gaike, Victor, Laurens, Jarno, Jehan, Wilm, Stan, Freark,Garrad, Mirthe en Joep zeent. Det vuurstellen geet rechtevoort met nen powerpoint of een vlo
Mer viej hadden het oawer de hobby's van miene deels nieje collega's. Jarno verteeldn zo mear det'e mangs visket. Nooit eweten! Zol hee wal verskil zeen tusken nen pekkelhearing, nen broasem, nen karper of een bäkn kibbelingen. 'Iej mun toch wát zeggen,' zea-r-e miej later. Jea, zo geet het vake. Ook völle collega's deden an mountainbiken. Det kleenkt ook better as mangs hen fietsen langs de Regge. Zengt dán de'j een rondje Bodensee, of Passau-Wenen hebt e-doane. Al zi'j ook stoomp verreangd, dan nóg was het skitterend, 'ja, af en toe een betje regen, dat frist zo lekker op'. En wat miej van al dee verschillende collega's opvöl is det alleman het gezin, de wichter, de stea woer at ze wont, heel belangrieke veendt. Mer jea, dan zee'j wier foto's van huze met lappen grös der um hen en ik heurden gin meanske oawer het grote bezwoar op al dee huze.
Hobby's van jagen tot visken, van peardrieden tot piano-spöln kömmen langs. Leu met oetdagingen an boargbeklimmen en met vuur miej onmeugelijke doelen as de Jungfrau, de Mont Blanc en de Himalya. Gin measke vrög het ooit wier, mer het steet wal gloepens stoer. 'Ja, ik hou er wel van om mijn grenzen op te zoeken'. Kiek, dét is het woarkvolk det at métdut. Doar vaalt visken an de Regge, noar Vierhouten hen op vakaantie en het leewste earpeln-met-moos steal biej in 't niet.
Gerard Voortman