Martin ter Denge
DOOT WA'J ZEGT…
"Mooooien vlog man!" Nen jongen gast bölket mie dat in et oor oawer et kabaal van de coverband en et gebear van doezenden andere Riessenders. Boengs! Nen dens op 'n skoolder krieg ik der ook nog bie. 'n Beer slatert mie der van oawer de bokse. Of dee'k dat non zelf? Naja, ik hebbe der et gode tuug vuur an etrökken en et feestjen geet et mooi an. Tut kearl en tot in de gloria!
Hee hef et oawer twee vlogs dee as et meaken en ik vuur Toerisme Riessen-Hoolten op enömmen hebt. Met de tonge op et doarde knoopsgat treaden duur de Sallandse Alpen en in gevecht tegen helse muskieten bosken duur de Riessense jungle, mer wat ne wille. Iej mut der wat van maken a'j der dan toch met gangs zint, nit dan? Wiej doot dat in et Tweants en et Hollands. Gewoon nöast mekoar. Zo as det altied al geet.
Den jongen geet verdan dat wiej dat Tweantse der in mut hoolden. Na kearl, doar zin iej helemoal zelf bie: gewoon bliewen kuieren en duurgewen an et volgende geslacht. Egenwies wean. Mer a'j ze der noar vroagt, stottert völle leu der rap achteran dat de wichter wal good Hollands mut learen. As of dat nit nöast mekoar kan. As of menear Wessels ondanks zin Riessens nit op twee in de Quote steet. Mer ja, zo goat dee dinge: leu wilt wal at et blif, mer ze wilt der zelf nit wat vuur doon. En achterof lippen en lamenteren dat et toch zo jammer is. Tja, doar zin ik ginnen kearl noar. A'j wat wilt, mu'j et anpakken. Opsprekken. Practice what you preach. Doot wa'j zegt…
Net as et After Summer Festival. Dat pakt ze ook verdan better an. Ooit begunnen as een heanig feestjen van een koppel möage in nen peardebak en nen vriejen gift in ne melkbusse. Non een tweedaags festival met half ondernemmend Riessen der achter. Mooi an epakt, Dieks en kesjotten! Dettededdut en attakan in Riessen hè? Mer wal strak um klok 0:00 'n knop umme. Te zeen an de macht volk wat nog twee uur länger bleef rondhangen, warren et der mer weanig met eens. Gewoon verdan doon tookommend moal. Vake zin iej te bange.
Met dat Tweantse net zo. Vind iej et jammer dat et verdwient? Wat doo'j der zelf an um dat te vuurkommen? Nöalen oawer vroger? Of zorgen dat et met de tied metgeet? Gewoon kuieren met de kleanen. Nit zo mangs ne keer, mer stöadig, as volweardige sproake. Dat kan prima nöast Hollands. Wat, ik kenne der ene oet Noord-Duutsland den as nöast öar Plat ook Fins, Saams (oet Lapland), Engels en Japans kan. Oh en dat steet öar Hoogduuts ook niks in de weg. Meartaligheid is de normaalste zaak van de wearld. Weast toch nit zo dom, kuiert ook gewoon Plat.