Gerrit Dannenberg
Skeetbane
Vanwekke zin'k vuur 't eerste in min leawen oawer de Schietbaanweg efietst. Ik kömme terugge van een mooi gesprek met Nick Waanders van Letz Meat in Eanter. Ne hele mooie etgeleagenheaid op de Braandputte. Lekker etn, grilln op kollen, alns nét 'n fietje better en vuur ne skappelijke pries. Gewoon ne keer proberen. Op de terugweg noar 't hoes sleu'k zo mear leenks-of de weg in noar de oale skeetbane van skeetvereniging Tubantia. Der stoat prachtige huze in 't greun en 'n eandke wieterop de steendern skeetpoorten. Der haank een brödje biej woer op steet det de poorten op de gemeentelijke monumeantenlieste stoat. De poorten zeent oale braakn. Gelukkig is Jan Flim, veurig skutter biej Tubantia, van plan um der wier wat moois van te maken. Net as in Wierden, woer ze ook de oale skeetbane in eare hersteeld hebt. 'n Good plan um 'n mooi stukke geschiedenis wier ne kaans te gewen.
Verleden wekke köm der 'n köppelke fietsvolk op 't museum. Ze warren op vekaansie biej Ans en Henk Altena van 't Overveen en ze wollen Riessen better learen kennen, mer dan wal op de fietse. Noh, doar kö'w vuur zorgen etuurlijk. Ik zir met eur begunnen biej een fontein op 'n Skeeld. A'j good kiekt kö'j doar ook nog een poar oolde gebouwen anwiezen as Menear, 't oolde plietsiejburo en de Skeeldkoarke. An 't nieje gemeentehoes zit de leste Riessender baksteender. Viej zeent um de Skeeldkoarke hen-elop en a'j dan achter de Skeeldkoarke nöast de Learkamer de kaante opkiekt van 't pakhoes van Leonard Koediek, zee'j nog een mooi historisch plaatje. Op de Bevervoorde steet de broonzen maquette van Riessen tusken de stadswälle, biej de baanke het standbeeld met helm en hoond, dan oawer de Giezen duur de Rozengaarde, biej de Dionysiuskoarke twee keer leenks oawer de bignmoarkt noar de oalde beestemoarkt. Duur 't Hangerad, de best bewoarde oale buurte van Riessen, het Park, de Pelmölle en toen terugge noar 't museum vuur de koffie. Roem een uur fietsen. En dee leu zeaden: "Riessen is gleuinig mooi."
En zo is 't. A'j langs de skeetbane een bos duurfietst kom iej zon betje achter de blokhutte van de scouting oet. Mooi hoarfswear, mooie kluren. Biej Piet van 't Witte Hoes terugge noar de rotonde richting Rijsserberg. A'j nit weelt klimmen, kö'j oonderlangs fietsen noar 'n Jöddenkoarkhof. Op de Hoge Bank zat gin mens en biej de Eerste Heaide speulden een stel jongens soldöatje. Ze zatten al geent achter een computer… Biej 'n viewer an de Reggesingel zatten een stel möage te visken… Ook zoonder computer... Der is nog hoppe!