Marieke Dannenberg
Nobody kisses better
Toen'k 13 joar wes warren dree dingen vuur miej van leawensbelang: deodorant, kauwgom en Labello. Wat er ook gebuurden, ik moche nooit noar zweet roeken. Doarumme leupe ik 'n helen dag in ne mierzeute wolke van 8x4 of Vogue. Net o'k biej nen suikerspinkroam woarken. Gin gesteenk oonder de oarme, mer ook zeker nit oet 'n haals. Hele päks Sportlife-kauwgom göng d'r per dag duurhen. En netuurlijk vuur zachte en mooie lippen: Labello - Nobody kisses better! Met disse dree woapens wa'k oaweral op vuurbereaid: iej weet mear nooit wee'j wonnear tegenkomt…Det he'k wal een poar joar zo vol-eheulden. To'k te heuren krege det oewn kaak kan verslieten duur kauwgom kauwen, vuural a'j vake an ene kaant kauwt. En det er laxerende stoffen in kauwgom zit dee zölfs kaankerverwekkend köant wean. Gin kauwgom mear dus.
Toew leus ik oarns det deodorant ook nit aaltied zo good is as 't rok. In alle antiperspirant deo's zit aluminium. Det verstopt oewne oksels en dan kan 't zweet nit meer vot. Doarnöast is aluminium meugelijk kaankerverwekkend. Gin zeute deodorant mear dus. En vurige wekke was doar 'n dröppel: ook Labello kö'j nit mer veailig smearen! Biej lippenbalsems van bekeande moarken as Labello, Blistex, Eucerin en Vaseline zeent meugelijk kaankerverwekkende stoffen en hormoon-ontregelaars an-etröffen. In huidverzorginsproducten doot disse stoffen oe niks, mer in lippenbalsems is het gevoarlijk umdet iej ze dan insloekt. En dat kan best völle wean: regelmoatige smearders kriegnt al gaauw zon 20 gram lippenstift- of balsem per joar binnen. Ik zir dus al 14 joar zonnen trouwen Labello-smearder!
Het woord Labello is of-eleaid van de Latijnse weurde "labium" (lipn) en "bellus" (mooi). Labello besteet al vanof 1909. Mear dan 100 joar zorgt Labello dus vuur good verzorgde, zachte en mooi lippen. Labello original, Labello Hydro Care, Labello Active For Men, Labello Sun Protect, Labello Kamille, Labello Gloss And Shine, Labello Lip Butter, Labello in allemoal kluren, geuren en smaken. Iej köant het zo gek nit bedeanken of d'r is nen Labello vuur. Labello is op dit momeant het meest gebroekte lippenverzorgingsproduct op de wearld duur vrouwleu én kearls! Wat kearls weelt 't nit weten det ze Labello smeart en doot 'r stiekem in 'n auto op, want ze weelt netuurlijk ook mooie en zachte lippen hebben!
En non is Labello as leste van minne dree woapens vuur 't leawen ten oonder-egoan. Ze hebt oonderwiel 'n slogan ook an-epast: Labello – Nobody loves lips more. Noh, ik weet 't wal: ik kope vanof non lippenbalsem den nog nit is of-ekuurd. Gelukkig is 't met miej toch nog good ekömmen.
Marieke Dannenberg