MARTIN TER DENGE
Stillen Zoaterdag
Vuur een joar terugge krege wiej nieje noabers. Vlucht oet Syrië, vuur et huttenvolk wat doar hoeshöld. Slim zat. Ik vreug mie toen of of ik der ne keer an mos goan. Angoan deden ze et zelf ook vake, mer ik bedole ne keer n kop um de dure stekken. Dat geburen toen as ze wier es feest harren. Et was op Stillen Zoaterdag. Den naam deden ze nit echt eare an. Wat gung et der of! Mer ja, noa nen dag hard worstelen en nen goden telder vol etten wol ik wal eaven heanig vief minuten bankzaken doon. Dan helpet zun feest duur dee dunne muurkes nit echt. Doarbie harren ze zun betjen álle wekken wal wat te vieren. Anders nit zo slim, mer mangs kan et ook te gek goan. Ik stiefelen der heanig op de hoajen hen en manen öar of et ook wat minder kon. Mét was et gebear of elop. Fein! Danksweard!
Ik draperen miezelf wier oawer de banke en volden de oogleden wier op mekoar. Trrrring! De belle. Doar stund et hele feestcomité. Et gezin zelf en zo'n betjen alle gäste. Of wiej zin harren um met te vieren. Jah, wo kön iej feestklagers non better tegengoan dan ze der bie neudigen, nit dan?
Binnen zat nog wal eens zovölle volk. Sunt Kristoffel en Moder Maria lachen ons vanof de mure too. In den middeln van de kamer ne grote toafel. Ten minsten, dat meanen ik, want iej zaggen enkel etten. Sköale vol met häpkes, stoete, rullekes van palmblad. Wat wiej drinken wollen. Beer? Raki? Dat leste har ene van de gäste zelf estokkerd. Wo stoark wus hee nit, mer iej wörden der wal good duzelig van. Ene van de jongs deed oaverzetten tusken Riessens, Hollands en Arabies. Noaberman leut op et striekbot foto's van ne gezellige gezinsvakantie in Libanon zeen. Doodgewoon, net as hier. Töt n oorlog köm. Nen prachtigen oawend ehad. Van dee gastvriehead kö'w nog wat learen.
Verleden wekke stund inenen den hoesbaas an de dure. Of wiej wat oawer de noabers wussen. Et was inderdaad al heel wat zoaterdeage stille. Wiej meanen dat ze op familiebezeuk in Duutsland of Zweden warren, mer noa acht wekken zin iej doar wal ne keer oet ekuierd. Toch goa iej ook nit alle dage breedoet bie andere leu duur de roeten stoan loeren. Nen wolk fruitvleegkes har in de kökkene al glad (zwart) woark emaakt van de fruitskoale op de toafel. De hoesslöttels leaden in de vensterbanke. Zollen ze vlöagen wean?
Nen deperen blik noar binnen leut inderdaad zeen at Kristoffel en Maria der ook nit mear hungen te lachen. Dee nem iej nit met as iej meant dat iej hier wierkomt. Skienboar zint ze wier thoes. In Syrië. Hop ik dan. Mooi dat et zo kon. Goodgoan. Maakt der wat van. Beniejd wat ne mooien der non wier in komt.