Marieke Dannenberg
Moarkvaste
Sommige leu zweart biej nen Batavus-fietse, vuur elk gebroek en elk momeant. Aandere leu jaagnt 't hele leawen in nen Peugeot, want iej veult oe lekkerder in nen Peugeot. En as 't um tuinmeubeln geet, dan is Hartman dé specialist. Dee lellijke witte tuinsteule dee't opa en oma dartig joar geleden hebt ekoch weelt mer nit kapot. En a'j d'r nit van hooldt um prima functionerende dinge vot te gooien, dan zit iej oawer dartig joar nóg op dee steule.
Umda'w oonderwiel dartig joar an innovatie vearder zeent, zo'j deanken det aandere fabrikaanten de keunst van 't meubelmaken wal of hebt ekekken. Doar gung ik tenminste wal van-oet. Want um non extra te betalen allene vuur 't moark, doar doo ik nit an met.
Vuur oons trouwen harre viej biej de Emté een goodkoop tuinset biej mekoar-espoard. Dan ko'w oarns op zitten at de zunne scheen en dan ko'w noa een poar joar wal een écht tuinset kopen. Biej de housewarming zakten mien va al duur nen stool hen. Toen der van nen aandern stool de lönning ofbreuk, köm der gin ene mear op bezeuk in 't zommer, want ze dorven nit op dee leawensgevoarlijke steule zitten. Det tuinset gung dus nog körter met da'w dachen. Dus viej enthousiast op tuinmeubeljacht.
Teegnwoordig zeent gecoate metalen tuinmeubeln helemoals in. Det leek oons ook wal wat. Dee metalen steule hebt ne zitting en ruglönning van dook en doar kö'j ook prima op zitten zoonder zon zweterig tuinkussen. Viej hebt ze almoal oetprebeerd: stapelsteule, steule met verstelboare ruglönningen, steule met ne rechte zitting en ruglönning en ergonomisch verantwoorde steule. Wal of gin Hartman, 't verschil kö'j nit zeen of veulen, behalve in de knippe. Dus viej kochen een mooi set van Bellagio.
Ne wekke later worden het tuinset ebracht. D'r zatten krassen op de steule, peunten in de coating, 't dook was slecht of-ehecht en de toafel was beschadigd. Det kon toch nit woar wean! De service van de tuinmeubelzaak was perfect. Viej mochen kiezen: ne korting of nieje meubeln. Het was oons um een mooi tuinset te doon, dus viej keuzen vuur nieje meubeln. Mer jammer, ook 't nieje set was beschadigd. Viej hadden d'r dikke tabak van en steurden het hele tuinset weer terugge.
Non he'w nog ginnen stool um op te zitten. Gelukkig is 't wear d'r ook nit noar. En at wier zo vear is det de zunne duurbrek, dan 'wordt het weer Hartman weer!'
Marieke Dannenberg