Stoats-greppe…
Noa de stennis oawer Hennis keump d'r röste op 't Ministerie van Defensie. Doar is Ank Bijleveld minister. Röste…? Ha'j edach! Alverdan lig Oaweriessel an de leste titte as het oawer defensie geet. In oorlogstied wa'w aait de klos. In 'n Tachtigjoarigen Oorlog ha'j hier vandeage Spanjolen en moarn de Geuzen. Bommen-Bearend de Koodeef hef van alns oet disse gewesten vot-eslept richting Meunster. In de Fraanske tied ha'w te lieden oonder Engelsen, Hannoverianen en doarnoa oonder de Fransozen. In 'n Tweeden Weareldoorlog moche viej hier allenig de bruggen opbloazen en beume ummehakken, de verdediging begun pas an achter 'n Iessel. Op 'n Grebbeboarg was 't pas meanens Nóa 'n Tweeden Weareldoorlog köm d'r nen geheimen beunkerverdediging langs 'n Iessel, want de regerige dach dat de Russen 't grötste belang harren biej Rotterdam. Hier was niks epland. Viej mochen belasting betalen en de Russen tactisch an de proat hoolden en gezellig tehope moscovisch gebak etten. Mear now wordt alns aans! D'r lig al joaren een geheim plan in Zwolle. En dat goat ze non oetvoeren, met Ank B. en Arie Slob. Vanoet Defensie dut Ank in 't gèlle kleedje ne staatsgreppe: énen revolver is al genog. D'r zeent toch gin aandere gewearen op Defensie en zelfs met den enen defensierevolver mut Ank nog Pang! Pang! ropen biej gebrek an echte kogels. En dan stekt alle ministers de haande in de loch. Allenig Arie hooldt de haande laconiek in de boksentaske. Ammoal mut ze tekenen vuur 'n zelfstaandig Twente. Nee, nit vuur heel Oaweriessel, dat is té völle heuj op de vorke. Het Könninkriek Twente! Vot met den gellen boemeltrein op éen eankel spoer van Zwolle noar Eanske, (nota bene met 't opschrift "in opdracht van de Provincie Oaweriessel" - viej betaalt oonzen spoerweg dus zélf…)
En d'r keump dan toch nog dee snelweg tusken Zwolle en Eanske. En dan jach Arie Slob as minister van Oonderwies de erkenning van het Nedersaksich d'r duur. Buma geet akkoord dat 't Wilhelmus hier wordt vervöngen duur het Deenkel en Regge-lied, en viej mangt zelf nen niejen Commisaris van 'n Könnink stemmen. Wee? Nen echen Tukker? Ne vrouwe? Nen kearl? Pieter Omtzigt? Ik stelle vuur da'w eerst noagoat of hee of zee de sproake behearst. Dat-e het beste joa joa kan zeggen as-e nee bedoelt. Dat nen zwieger 't weent van de sprekker. Dat-e nit dreks antwoord gef mear eerst vróg: "Hoe zeg-iej det?"Dat-e nit dreks iets toogef mear reageert met: "Zol zo mer können." Regeren met nen tukkersen slag um 'n oarm. Dan goa'w vuur een schoon en dierboar Twe-hean-te, létterlijk, vot met 'n pröttel en as boer en as börger good wean vuur de beeste. Tied vuur Twente!