Gerard Voortman
Twenty four six
As Riessender is het aaltijd mooi det 'n aandern op Riessen pochet. Det gef oew dan een geveul van greutsigheaid, mear ook hoe dom at aandere gemeentes köant wean.
Kortens maken ik ook zo'n geval met. Het was biej ne excursie van de Vrezenvense ondernemmers dee at zik de oogne mochen oetkieken biej het bedrief van Mark van de Keuns in Riessen. De Keuns is nen groot-formaat stoalbouwer en hef een febriek woer at ze mesiens maakt
vuur het bewoarken van stoalne balkens. Fank Scherphof - koomp fealijk oet Vrezenvenne mer woont al länger in Riessen - woarkt biej de Keuns en dee de zakenleu oet 't Vjenne oet de deuker hoe ze det in Riessen doot. Het geheim is featlijk eenvoudig en löt zich samenvatten duurdet ze biej de Keuns good koant lusteren noar de klaanten, heel dichte op dee den klaanten zit, weet woer ze met gangs zeent, zengt wat zec doot en doot wat ze zengt en een excelleant product maakt. An 't eande kömmen nog een poar vroagen langs woer at alle Tweantse gemeentes boskop an munn hebben. Wat warn de verschillen en oawereenkomsten tusken Riessen en 't Venne? Um te beginnen, verteelden Scherphof, hebt beaide gemeentes hele mooie bedriewen. Joa, det klopt. Net as det ze in beaide gemeentes wal hard weelt woarken. Det zea Scherphof nit, mear det is netuurlijk wál zo.
Wat vuural opvöl is det ze in Riessen mekoar ´n haandel gunt en ze heel good anveult de´j as gemeente, bedriewen en oonderwies mekoar neudig hebt en dä´j mekaander de bälle mun tooskuppen. Kiekt ook eens noar de verschillen in infrastructuur en hoe at een centrum der oetzut. As oold-Vreezenvensen skamen Scherphof zik bewieze van sprekken vuur het centrum van 't Venne, benaamd roond het gemeentehoes. Net of der ne bomme was evöllen. Nee, dan hadden ze det in Riessen toch völle better vuur mekoar. "Kiekt ook eens noar het spoer in Riessen. Doar is gin enen spoerweg-oawergaank mear, viej hebt hier aln deksel tunnels en det is wal zo plezerig." Wat ook opvaalt is det de gemiddelde leaftijd van het woarkvolk op 33 joar ligt. Heel joonk volk dus dee at ze maximaal verantwoordelijkheaid geewt en doar heel greuts van wordt en nóg härder goat woarken. Investeren in jeugd dus! Nóg één deenk woer de Keuns zik met oonderscheaidt ten opzichte van völle aanderen: gin 24/7 mear 24/6 kloar stoan vuur klaanten. "Nee, der wordt biej oons op zoandag nit e-woarkt, gin beurzen, nit reaizen. Niks van det alns."
Van Skeppingsweage wee-w netuurlijk allemoal det det het beste is vuur de leu, mear a'j der as internationaal bedrief ook nog noar haandelt, is det froai te priezen.
Gerard Voortman