Martin ter Denge
Greunkuste
Nen helen ende zwemmen linksof oet de kuste van Afrika is et net of een onwies groot peard met één been van zik of etreaden hef. Et resultaat is tien heupkes en een betten gruus in hoofiezervörm. Cabo Verde. Greunkuste. Et har better Cabo Castanho (Broenkuste) können heten, want de meeste eilanden spegelt de oaverkante: Sahara. Toch zint der viefhonderd doezend leu heel tevreaden hier. 'No stress' is de nasjonale liefssprökke. Allens op zin elvendartigst. Met iederen trad wa'j härter loopt kom iej anders ook in n damp, want et is hier altied rond de vieventwentig groad.
Op et een-noa-leste eiländke, São Vicente, zatte wiej in een strakker dan strak Feng Shui-appartement. Vloerbeton gladter as Thialf, nen rustieken krullerigen bonsai vuur de roeten, kökkene met lecht marmer en een kokeiland, dik donker wengé-holt met witte steule, leavensgrote plakkoaten moderne kunst, ne koelkaste woer a'j oew skoonmoo in kwiet könt, dimmers op de lampen en as iej op een knöpken drukken, löchten ne kaste met zesteen soorten whiskey op… La Plume kan der een puntjen an zoegen.
Achter de grote skoefpui voren ne dikholtene trappe noar een strak wit dakterras op et anliggende huzenblok. Oetzicht oaver de haven van Mindelo (net iets grötter as Almelo). Mer dan mo'j nit oaver et rändke kieken noar de rest van et huzenblok. Hele stukke harren nog gin dak of muren. Doar umhen wier andere bouwgeraamtes met lösse dake, kiekduurmuren, en heupe ofval. Bewond, want der hungen oaveral kleare an broenroestige waslienen. Ook ons strakke apartement har bie nauwer kieken ook wal mankementen. Treuk iej in de kökkene iets te hard an de unterste lades, mo'j springen dat oe n plint nit op n tee daveren. En halverweage völ et elektries der achterhen. Pal achter de opsmukte marmerweelde van de lösse kökkene zatten de douche én de wc. Op anderhalven kwadraatmeter. Met ne dure met enkel blindering as ofsloeting. En de wc kon et papier nit an. Smakelik etten!
Et was een klassiek vuurbeeld van skone skien. Doar kan La Plu- nee huw eaven, dat is flauw. Ze doot der vaste zat an en allens hef zin wear. Loa'w et der op holden dat heel wat leu in Riessen zik ook heel drok maakt um de boetenkante. "Wat zölt de leu wal nit denken?" Terwiel as et van binnen ne grote drekkoele is. Dat ze oe vreandelik toolachet en nikket, mer a'j oet zicht zint geet der nen bearput lös. Op Kaapverdië kan iederene in ieder geval mekoars drekbende zéén. Doar hooft ze vuur mekoar de skien nit op te holden: "Iej hebt der toch net zonnen kroam van as ik." In Riessen leaden der nog nit zo lange leden ook nog grote drekheupe vuur ieder hoes. Dus doot mer nit zo deftig.