Martin ter Denge
HEB IEJ EAVEN?
De meeste leu trekt noar mekoar. Wie wilt oargens bie heuren. n Enen jag zik alle wekken in n damp bie n vootbal, nen ander mag gearne muziek maken. Wa'j doot is nit belangriek, a'j mer samen gangs zint. Mooi woark.
Vrieblievend is dat nit. Goa'j oargens bie, dan mu'j der wat vuur doon. Anders is et rap of elop. Potgrond of peppermunt langs de duren sleppen um geeld op te halen. Helpen oprumen. Of en too nen skapdeenst dreeien. Of an de bingomölle. De familie kump der ook nit onderhen. Ze mut oe halen en brengen (kön iej nit fietsen?). Of de vootbalkleare oetwasken. Vuur et hele team! Vriewillig ja. Iej viert mekoars verjöardage, deelt leef en leed, woarkt samen um et spul op de rit te holden. Ne verenige is eagenlik ne oart mini-samenleaving.
Mer tieden verandert. Of better ezegd: leu verandert. Verdan vaker dumpt olders de kinder achter et hekke. Eaven tied vuur zikzelf en et striekbot. Me-time (joa, dat woard besteet). Wat doon vuur de klub? Weast blie dat wie kontributie betaalt! Dat ze zelf dee kontributie lege könt holden duur an aksies met te doon is heel lastig te begriepen. Strak op de minute noa de training of repetitie haalt ze de möage wier of. Duursjezen noar et volgende. Nog eaven wat bekuiern met mekoar? Niks van an! Metkommen. Doert te lange.
Op nen mooien dag bie et muziek: "Menear, oeleu Sherrity-Logan-Vlinder mag vuur et eerste met oaver stroate!" - Wo late is dat of elop? "Tja, dat wee'w nooit zo in et vuurten. Kan half dree worden, mer ook wal half vere." Ja ho es eaven, hee mut ook nog hen zwemmen en doarnoa hef he nog honderd meter punniken... Ze mut oaveral bie wean en hebt noargens tied vuur. En as et eaven nit oetkump, doot ze rap via de app dat ze der nit bie zint. A'j geluk hebt nog met oetleg. Wal lusten, gin lasten. Dat der nen koppel leu op de opkomst en inzet van et verwende portret rekkent, is nit belangriek.
De mini-samenleaving lik akelig völle op de grote. Leu liekt verdan mear op zikzelf te worden. Et dreeit um IK. En bie ne verenige mut dat nog wal es an de kanten. Dat riemt zik natuurlik nit. Dan mer DJ wean, vuuran op een podium met de oarmen in de locht stoan. Ene van de bekendste zinnekes op vakansie ("You take picture of us?") is met de selfiestok verbannen noar de geskiedenisbeuke. Want huuh, iej zollen et toch umstanders mutten vroagen. Met échte leu kuiern, da's eng! Nen goden bak vertellen (ne kunst op zik!) is der ook nit mear bie. Wie steurt filmkes duur. Of neumt mekoar op Facebook in lollige memes. Allens vanachter een skoarm. Terwiel a'w allemoal andacht wilt, geewt wie et een ander verdan minder.