Marieke Dannenberg
Pluktuin
Iej hebt vaste wal 's een kilo kassen eplukt in de Betuwe of 'n möalke asperges estökken tusken Riessen en Wierden. Det is slim bedach van die telers: iej hebt oew fruit of greuntes lekker vas en iej haalt 't ook nog 's zelf oet de groond of van de beume. Iederene hooldt van vas, netuurlijk en biologisch en doarumme zee'j alverdan mear van dee pluktuinen. Zo zeent der pluktuinen um oew eagen boeket biej mekoar te plukken en d'r zeent pluktuinen woer je sezoengreuntes köant plukken. Biej oons thoes he'j joarenlaank de greuntetaske van Odin ehad. Met dat abonnement kö'j alle wekke ne taske met biologische greuntes ophalen. Der zit ook vake van dee vergetten greuntes biej as pastinaak, schorseneren en aardpearen. De meeste greuntes van Nederlanderlandse boadem ken ik dus wal en toen ik heurden van 'n pluktuin biej het Van der Valk Hotel in Apeldoorn leek 't miej heel romantisch um mienne eagen greunte te plukken. Vasker kan 't nit en het is ook nit deur (€ 2,50 per taske). Ik har zommervekaansie dus tied zat um doar eens te goan kieken. Op de site kö'j zeen wat de greunte van 't seizoen is en zochen op internet recepten dee passen biej dee greuntes. Met twee grote boskopntasken jaggen ik d'r op an. Ik stapten oet 'n auto en leupe noar den greuntetuin. De mood zakken miej in de skone, want det was ginnen moestuin zo as ik den van min groffa herinnere, mer een voetbalveeld met greunte. Ik leupe 'n rondje um det veeld en oonderwiel bedachen ik twee dinge: Hoo krieg ik dee greuntes met good fetsoen oet de groond? Hoo weer ik non wat vuur greunte het is? Ik har d'r gewoo nit an edach dat greuntes in de groond almoal op mekoar liekt. Ik zagge allene mer van die greune fuskes um miej hen. Gelukkig kreeg ik 'n mes van twee vrouwleu zoda'k in ieder geval wat greunte oet de groond kon snieden. Ik hoppen mer det ik ook ech andievie, paksoi en sloat met har enommen, aans zol ik wal heel creatief met dee recepten umme munn goan. In 't hoes in de kökken lea'k alns op 't anrech en maak ik d'r nen moojen foto van vuur de femilie-app. Mien va en moo warn greuts op de dochter dee zin eagen vaske greunte zo van 't laand haalden. Mer dan mu'j dee greunte nog bewoaren vuur ne hele wekke en het is nit vuur-esneden en in plastic verpakt zo as in de supermarkt. Ik zir 'n helen middag gangs ewes met dee steenkende, rotte bladen oet 'n paksoi te snieden, met wortels schrapen, de andievie vuur te snieden en 'n sloat te wasken. Een gotsteen en de vloere zatten oonder 't zwarte zaand en der kreupen almoal vieze deers oawer 't anrech. Wee weet zir ik dizzen elleande de volgende zommervekaansie vergetten, want aans keump d'r vuur miej gin greunte mear oet den pluktuin. Het is nit deur, mer iej hebt 'r gewoon nen dagtaak an um 't trechte te maken...
Marieke Dannenberg