Gerrit Kraa
Skeaiding
Wilm veendt niks meujer as iets te vroo biej de skearbaas (kapper, hairstylist, coiffeur, haarsnijder, barbier) binnen te vallen en dan too te kieken, benaamd as d'r krek nen jongen keal an de buurte is. Dèn zeg vriejmeudig: "eh, ik wil het zo en zo hebben, en dan an de achterkaante ietskes mear dit of dat en de vuurkaante mag wal wat kotter". Wilm zol doar vroger nit oawer prakkezeren um in 'n kappersstool anwiezingen te gewen. As de skearbaas destieds vreug hoe 't wean mos moompelden hee: "iej zeet mear." Dan wus de skearbaas genog: nen deankbeeldigen bloompot op 't heuwd en dan met zonne haandmatige tondeuse al knipbewegingen makend langs de raand van 'n fictieven bloompot alns vothalen, het kapsel van Kim oet Noord Korea. De skearbaas grep een spegel um Wilm het achterheuwd te loaten zeen mear Wilm köm al in de bene en zea: "is oké, wat zin ik oe skeuldig?" En vot was Wilm dan, anno 1950. Wilm herinnerden zik anno 2018 de oale adverteanties oet "de Spiegel" of "Panorama" van nen keal met golvend hoar met as biejskrift: 'O, Jan, wat zit je haar mooi!" Dat was ne adverteantie van Brylcream, vermoedelijk reuzel met guur en kluur. En dan steun-e zik vroger te wasken, 'n kop oonder 'n kraan, de höare nat maken en dan alns vuuroawer kammen, doarnoa leenks de höare opzied noar leenks en 't grötste deel van 'n hoardos noar rechts met ne strakke skeaiding d'r tusken. Joarenlaank hef Wilm vervolgens alle höare noar achteren ekamd, lekker makkelijk mear vuur de grap steun-e non wier ne skeaiding te trekken. Woerumme aait an de leenker kaante, vreug-e zik of. Ne kwestie van rechtshaandigheaid? Afijn, hee köm biej de kapper en wol zeggen dat-e in 't vervolg geane ne skeaiding wol, maar Wilm was bange dat de skearbaas um een oold wief zol veenden. Gelukkig was Wilm allenig met de kapper in de salon, aans was Wilm d'r al heemoas nit an begunnen um anwiezingen te gewen. As toppeunt van lafheaid zea Wilm: "minne dochters hebt miej commandeerd um in 't vervolg wier ees ne skeaiding te dreagen dus as 't nit te völle möaite is…" De kapper lachten begriepend (de klaant is könnink). Wilm köm thoes en wör bekekken duur de dochters. "Hoe kreeg iej den kapper zo gek?" vreug de öoaldste dochter. Wilm biechten earlke op dat-e de dree dochters har op evoerd as zinne commandanten. Hee kreeg een froai skoer duur de bene: "Va, va, wat loa'j oe kennen!"
Vroagje: woerumme wol Wilm op zinne heugere leaftied nog ne skeading in 't hoar? Nog een vroagje: woerumme verskoelden Wilm zik achter zinne dochters? Doarde vroage: woerumme verskoel ik miej achter nen Wilm dèn ik oet 'n doem ezöagen hebbe…?