Gerard Voortman
Herbergkraante
Kraanten te ballast. De Telegraaf, het AD, Parool, de Groene Amsterdammer, de Roskam (besteet helaas nit meer in de pepieren editie), het ND, het RD, het FD, Trouw, de Volkskrant, de Stentor, de PZC, de Tubantia en talloze wek-kreantjes. Vuur elke kluur, doelgroep, plaatse, strekke, interessegebied is der wal ne kraante. Iej hebt kraanten dee at vuur niks zeent en betaald wordt duur de afferteerders, iej hebt deure kraanten en kraanten woer at niks in steet zoas Tubantia. Of wek-kreantjes dee at vol stoat met ne katte in 'n boom hier en het slopen van een paand doar en vearders zoonder inhoold.
Vuur het eerste in min leawen heb ik de Herbergkraante koch. Ik loate miej zeelden verleaiden mer dizze moal mos ik oawer min harte strieken. Het was reagnderig en koold en ik mosse vuur nen klaanten ne fleske roden wien hebben. Non he'j rechtevoort biej elke supermarkt fesoenlijke roden wien. Loat oe jums nit wat wies maken de'j doar vuur noar ne deure slieteriej hen mun. Onzin: a'j de temperatuur good hebt en iej doot der een bölke keze biej, dan smaakt ook de supermoarkt Merlot-wien vanof zeuwen euro prima.
Reagen en koold dus. Ik stiefelden wier met dee fleske wien op minnen woarmen auto an. De roetenwissers roasden alle kaanten oet. Vuurboeten steun doar biej de Spar an de Beatrixstroate in Riessen zon, vermoedelijk Bulgaars, wiefke heel koold en heel nat eure kraanten te verkopen. Het contrast was miej te groot. Het möajden der miej van, zo misseun det vreandelijke vrouwmeanske doar steun. Ik vreuge wat dee kraante kostten. Det kon ze miej nit oetduutsen mer ze wees op de vuurkaante. Doar steet dan de verkooppries van €1,75 op, woervan at dan € 1,00 noar de verkopers geet. De kraante is trouwens niks. Het is allen deksel niejs oet Zwolle en contreaien, het hef nét een te groot lettertype en ook qua journalistieke inhoold is der nog wal wat op an te moarken. Het geet oawer Milcho den at opereerd mut worden en oawer Suzanne dee at verslaafd was an speed en GHB. Het interessantste stukke gung oawer straatdokter Rouzbeh den at nen vluchteling helpt. Netuurlijk is het good um 'n moal zon stukke te leazen mer ik zal vermoedelijk nit gaauw wier zonne kraante kopen en doar geet het dee kwetsboare leu vuural umme. In het colofon van dee kraant steet bevuurbeeld ook det de verkopers van dee kraanten zodoende in contact köant kommen met aandere leu. Allemoal mooi en wal, mer dee leu sprekt gin woard Hollaands. Det koomp dus nit good. At dee herberg-organisatie dee leu écht wil helpen, munnen ze vuur elke strekke ne editie maken, dus hier in Tweante met verhalen oet Tweante. En ne korte cursus basisbeginselen Nederlandse taal zol ook nit verkeerd wean.