Gerrit Dannenberg
'n Stoom
At 't op 't Riessens Museum oawer een Stoom geet kö'j de steule nit ansleppen biej de beeldpresentaties van Jan van de Maat, André van den Houten, Gerrit van de Maat en Gerhard Baan. Mooi det de leu zo tooverdan de weg weet noar 'n Oosterhof.
'n Stoom is verbeunden met nen helen hoop Riessenders. Kan ook nit aans: in de joaren zestig woarkten der roond de 1300 leu. A'j rekt det Riessen toen zon 10.000 inwonners har, dan kö'j wal noagoan det 'r in hoaste elke Riessender femilie wal nen va, breur, zuster, groffa, eum of tante in 'n Stoom is ewes. Iej köant 't geleuwen of nit, mer zelfs skeidsrechter Erik Braamhaar hef der nog ewoarkt. Begin 2003 was 't gebuurd met de jute. De 50 man den der toen nog woarkten kömmen op de keajen. Toen zat 'n Stoom al an de Nijverdalseweg.
De beeldpresentatieoawende zeent slim gezellig. Met 'n aln kieken noar de foto's op 't grote scherm. Jan van de Maat verteelt oawer 't ontstoan van Trös. Woerumme in Tweante en nit oarns aans? Woerumme jute en gin ketoen? En dan det hele grote complex met batchingkamer, krasserieje, stoarkerieje, spinnerieje, weawerieje, kalaanderieje. En dan de plaatjes van alle leu dee der woarkten. Mer ook het badhoes an 'n Boomkaamp met de verhalen, 't Park en 't muziek van 'n Stoom.
Én nog aaltied dee grote tegenstelling tusken vuurstaanders en tegenstaanders. De skeaide löp dwars duur de zale hen. De jongere generatie kik vol ontzag noar 'n umvaank van Ter Horst & Co en de verneamstigheaid van den tied. De euldere generatie den der woarkt hef met völle wille of met verdreet.
Iederene beleawt de herinneringen op zinne eagne manere. De leste keer gong 't allemoal good, mer toen zea Jan van de Maat det 't Engelse Woark an de Wierdenseweg miskien wal in de bene har munn bliewen. En dan komt de emoties lös. Ik zatte nöast Wilm Companje. Den zea: "Ik zol nit weetn woerumme!" Wilm is imker, mirreweenterhoornbloazer en vuural een plezerig man den zin leawen in 'n Stoom ewoarkt hef. Nen hoop wille had ook. "Mer a'j noagoat hoo hard doar ewosselt, ezucht, ezweet en evlok is, dan mu'j zukke gebouwen nit mear in 't oge hebm stoan."
A'j 25 joar in 'n Stoom ewoarkt hadden kree'j een speeldke in 't revear van 't buis. "Doar zeent ze later moet oet-eskeaid," zea Willem met ondeugnd gleensterige ogen. "Want iej konn an det speeldke nit zeen o'j der 25 joar ewoarkt of 25 joar ewes warren."